ஸ்பெயினிலிருந்து லண்டன் நோக்கிப் புறப்படவிருந்த ஈசி ஜெட் (EasyJet) விமானத்தில், உயிரிழந்த மூதாட்டி ஒருவரின் உடலை உயிருடன் இருப்பவர் போலச் சக்கர நாற்காலியில் ஏற்றிச் செல்ல முயன்ற சம்பவம் பெரும் அதிர்ச்சியை ஏற்படுத்தியுள்ளது.
கடந்த டிசம்பர் 18 அன்று, ஸ்பெயினின் மலகா நகரிலிருந்து லண்டனின் கேட்விக் நோக்கிப் பயணிக்கவிருந்த விமானத்தில் ஒரு பிரித்தானிய குடும்பம் நுழைந்தது. அவர்கள் தங்களது 89 வயது மூதாட்டியைச் சக்கர நாற்காலியில் அழைத்து வந்தனர். மூதாட்டி மிகவும் சோர்வாகவும், உடல்நலம் பாதிக்கப்பட்டும் இருப்பதாக ஊழியர்களிடம் அவர்கள் கூறியுள்ளனர்.
விமானத்திற்குள் மூதாட்டி எவ்வித அசைவும் இன்றி அமர்ந்திருப்பதை அவதானித்த சக பயணிகளும், விமானப் பணிப்பெண்களும் சந்தேகம் அடைந்து உடனடியாக விமானிக்குத் தகவல் தெரிவித்தனர். இதனைத் தொடர்ந்து, புறப்படத் தயாராக இருந்த விமானம் மீண்டும் முனையத்திற்குத் திருப்பி அனுப்பப்பட்டது. அங்கு வந்த மருத்துவக் குழுவினர் மூதாட்டியைப் பரிசோதித்தபோது, அவர் ஏற்கனவே உயிரிழந்துவிட்டமை உறுதி செய்யப்பட்டது.
இந்த விவகாரம் குறித்து ஈசி ஜெட் நிறுவனம் தெரிவித்துள்ளதாவது சம்பந்தப்பட்ட குடும்பத்தினர் மூதாட்டி பயணம் செய்யத் தகுதியானவர் என்பதற்கான ‘Fit to Fly’ மருத்துவச் சான்றிதழை வைத்திருந்ததாலேயே அவர் அனுமதிக்கப்பட்டார்.
இந்த அசாதாரணச் சூழல் காரணமாக விமானம் சுமார் 12 மணிநேரம் தாமதமாகவே புறப்பட்டது.
உயிரிழந்த உடலை விமானத்தில் கடத்த முயன்றது ஏன் என்பது குறித்து விசாரணைகள் நடைபெற்று வருகின்றன. அதேவேளை, உடல் நலம் பாதிக்கப்பட்ட பயணிகளை அனுமதிக்கும் நடைமுறைகளை விமான நிறுவனங்கள் மீண்டும் மறுபரிசீலனை செய்ய வேண்டும் எனப் பயணிகள் தரப்பிலிருந்து அழுத்தங்கள் அதிகரித்துள்ளன.
