வெடித்துச் சிதறிய பஸ்! – இருவர் உயிரிழப்பு!! – ரஷ்யாவில் அதிர்ச்சிச் சம்பவம்

வெடித்துச் சிதறிய பஸ்! – இருவர் உயிரிழப்பு!! – ரஷ்யாவில் அதிர்ச்சிச் சம்பவம்

ரஷ்யாவின் தென்மேற்கு நகரமான வோரோனேஜில் பயணிகள் பஸ் ஒன்றில் ஏற்பட்ட வெடிப்புச் சம்பவத்தில் இருவர் உயிரிழந்தனர். 17 பேர் காயமடைந்தனர்.

இந்தச் சம்பவம் நேற்று வியாழக்கிழமை மாலை நடந்தது என்று அந்த நாட்டு ஊடகமான ‘TASS’ தெரிவித்துள்ளது.

வெடிப்புச் சம்பவம் நடந்தபோது பஸ்ஸில் 30க்கும் மேற்பட்டவர்கள் இருந்துள்ளனர். இதுவரை வெடிப்புச் சம்பவத்துக்கான சரியான காரணம் கண்டுபிடிக்கப்படவில்லை.

சமூகவலைத் தளத்தில் வெளியான வீடியோ ஒன்றில், வெடிப்புச் சம்பவம் நடந்தபோது பஸ்ஸின் வெளிப்புறங்கள் கிழிந்து உள்ளிருந்த பொருள்கள் சிதறிப் பறப்பதைக் காண முடிகின்றது.

இந்த வெடிப்புச் சம்பவத்தில் காயமடைந்த பெண் ஒருவர், சம்பவம் நடந்து சிறிது நேரத்தில் உயிரிழந்தார். இன்னொரு பெண் வைத்தியசாலையில் சேர்க்கப்பட்ட பின்னர் உயிரிழந்துள்ளார்.

காயமடைந்தவர்களில் பலரின் நிலைமை கவலைக்கிடமாக உள்ளது என்று உள்ளூர் பொலிஸ் அதிகாரி ஒருவர் கூறுகிறார்.

அந்த நாட்டின் பெரும் குற்றங்களை விசாரிக்கும் புலனாய்வுக் குழுவின் வோரோனேஜ் நகரக் கிளை இந்தச் சம்பவம் தொடர்பான விசாரணைகளை ஆரம்பித்துள்ளது. பஸ்ஸை பராமரிப்பதில் ஏற்பட்ட கவனக் குறைவே இந்த வெடிப்புச் சம்பவத்துக்குக் காரணம் என்று ஆரம்ப விசாரணைகளின் பின்னர் அந்தக் குழு கூறியிருக்கிறது.