சபாநாயகரின் கொத்து விருந்தே தேவையற்ற சிக்கல்களுக்குக் காரணம்! – சாமர சம்பத் தசநாயக்க காட்டம்.

நாடாளுமன்றப் பிரதி பொதுச் செயலாளர் நியமனம் தொடர்பாக தற்போது எழுந்துள்ள சர்ச்சைகளுக்குச் சபாநாயகரின் தவறான நடத்தையே காரணம் என நாடாளுமன்ற உறுப்பினர் சாமர சம்பத் தசநாயக்க சபையில் இன்று (03) குற்றம் சாட்டினார்.

நாடாளுமன்ற அமர்வில் கலந்துகொண்டு உரையாற்றிய அவர், சபாநாயகர் ஜகத் விக்கிரமரத்னவைச் சாடிய முக்கிய விடயங்கள்.

சபாநாயகர் தனது அலுவலகத்தில் சில நபர்களுக்கு ‘கொத்து’ (Kottu) விருந்து வழங்கியதில் இருந்தே இந்தப் பிரச்சினைகள் ஆரம்பமானதாக அவர் சுட்டிக்காட்டினார்.

மக்களுக்கு உணவளிக்க வேண்டிய இடங்கள் தனித்தனியாக இருக்கின்றன. ஒருவர் தனது உத்தியோகபூர்வ அலுவலகத்தில் வைத்து இவ்வாறான செயல்களைச் செய்ய முடியாது என அவர் தெரிவித்தார்.

இவ்வாறான பொருத்தமற்ற நடத்தைகள் காரணமாகவே பிரதி பொதுச் செயலாளர் போன்ற உயர் பதவிகள் தொடர்பாகத் தேவையற்ற சர்ச்சைகள் உருவாகியுள்ளதாகவும், பொறுப்புவாய்ந்த பதவிகளில் இருப்பவர்கள் பிரச்சினைகளை உருவாக்கக் கூடாது என்றும் அவர் வலியுறுத்தினார்.

இந்த விவகாரம் சபையில் இன்று சிறு பரபரப்பை ஏற்படுத்தியிருந்தது. பிரதி பொதுச் செயலாளர் நியமனம் தொடர்பாக ஏற்கனவே பல்வேறு அரசியல் விமர்சனங்கள் முன்வைக்கப்பட்டு வரும் நிலையில், சாமர சம்பத்தின் இந்தக் கருத்து மேலும் விவாதத்தைக் கிளப்பியுள்ளது.