மத்திய கிழக்கில் போர் தீவிரமடைந்து வரும் நிலையில், தெற்கு லெபனானின் கஃபர்ஹதா (Kafr Hatta) கிராமத்தின் மீது இஸ்ரேல் நடத்திய வான்வழித் தாக்குதலில் 4 வயதுக் குழந்தை உட்பட ஏழு பேர் கொல்லப்பட்டுள்ளனர். லெபனான் கிறிஸ்தவர்கள் ஈஸ்டர் ஞாயிறைக் கொண்டாடிக்கொண்டிருந்த வேளையில், இந்தத் துயரச் சம்பவம் நிகழ்ந்துள்ளதாக அந்நாட்டுச் சுகாதார அமைச்சகம் தெரிவித்துள்ளது. பெய்ரூட்டின் ஜ்னா (Jnah) பகுதியில் நடத்தப்பட்ட மற்றொரு தாக்குதலில் 4 பேர் கொல்லப்பட்டதுடன், 39 பேர் காயமடைந்துள்ளனர்.
கடந்த மார்ச் 2-ஆம் தேதி ஈரானுக்கு ஆதரவாக ஹிஸ்புல்லா அமைப்பு இஸ்ரேல் மீது தாக்குதல்களைத் தொடங்கியதிலிருந்து, லெபனான் இந்தப் போருக்குள் தள்ளப்பட்டது. தற்போது ஈரானுக்கு எதிரான அமெரிக்க-இஸ்ரேல் கூட்டுப் போரின் ஒரு பகுதியாக, லெபனான் மீது இஸ்ரேல் தரைவழி மற்றும் வான்வழித் தாக்குதல்களைத் தீவிரப்படுத்தியுள்ளது. லெபனான் எல்லைக்குள் 30 கி.மீ ஆழம் வரை ‘பாதுகாப்பு மண்டலத்தை’ (Buffer Zone) உருவாக்கத் திட்டமிட்டுள்ள இஸ்ரேல், அந்நாட்டின் 15% நிலப்பரப்பில் வசிக்கும் மக்களை வெளியேறுமாறு உத்தரவிட்டுள்ளது.
பெய்ரூட் மற்றும் அதன் தெற்கு புறநகர்ப் பகுதிகள் நேற்று நாள் முழுவதும் குண்டுச் சத்தங்களால் அதிர்ந்தன. சிரியாவுடனான முக்கிய எல்லைக் கடவையான மஸ்னாவை (Masnaa) ஹிஸ்புல்லா அமைப்பு இராணுவத் தேவைகளுக்குப் பயன்படுத்துவதாகக் குற்றம் சாட்டிய இஸ்ரேல், அங்கிருந்து மக்களை வெளியேறுமாறு எச்சரிக்கை விடுத்துள்ளது. இந்தப் போரில் இதுவரை 400-க்கும் மேற்பட்ட ஹிஸ்புல்லா போராளிகள் கொல்லப்பட்டுள்ளதாகத் தகவல்கள் தெரிவிக்கின்றன. அதேநேரம், லெபனான் தரப்பில் உயிரிழந்தவர்களின் எண்ணிக்கை 1,461 ஆக அதிகரித்துள்ளது.
இஸ்ரேலின் வெளியேற்ற உத்தரவுகளுக்கு மத்தியிலும், தெற்கு லெபனானில் உள்ள எல்லைப்புறக் கிராமங்களில் சுமார் 9,000 லெபனான் கிறிஸ்தவர்கள் தங்கள் வீடுகளை விட்டு வெளியேற மறுத்து அங்கேயே தங்கியுள்ளனர். போரினால் இதுவரை பத்து லட்சத்திற்கும் அதிகமான மக்கள் இடம்பெயர்ந்துள்ள நிலையில், லெபனான் தனது வரலாற்றில் மிகவும் வன்முறையான நாட்களைச் சந்தித்து வருகின்றது. சர்வதேச சமூகத்தின் போர் நிறுத்தக் கோரிக்கைகளுக்கு மத்தியிலும், தாக்குதல்கள் குறையாதது பெரும் கவலையை ஏற்படுத்தியுள்ளது.