மத்திய கிழக்கில் நிலவும் போர்ச் சூழல் மற்றும் உலக சந்தையில் கச்சா எண்ணெய் விலை உயர்வு போன்ற வெளிப்புற அழுத்தங்கள் இலங்கையின் பொருளாதார ஸ்திரத்தன்மையை எந்த வகையிலும் சீர்குலைக்காது என மத்திய வங்கி ஆளுநர் கலாநிதி நந்தலால் வீரசிங்க தெரிவித்துள்ளார். புளூம்பெர்க் ஊடகத்திற்கு வழங்கிய நேர்காணலில் இதனை உறுதிப்படுத்திய அவர், கடந்த கால பொருளாதார நெருக்கடியிலிருந்து பாடம் கற்றுக்கொண்ட இலங்கை, தற்போது எத்தகைய திடீர் அதிர்வுகளையும் தாங்கிக்கொள்ளும் அளவிற்கு வலுவான நிதி மற்றும் அந்நியச் செலாவணி கையிருப்புப் பாதுகாப்பைக் கொண்டுள்ளதாகக் குறிப்பிட்டார்.
கடந்த பொருளாதார நெருக்கடியின் போது பணவீக்கம் 70 சதவீதமாக உயர்ந்திருந்த நிலையில், தற்போதைய பணவீக்கம் 1.6 சதவீதமாக மிகக் குறைவாகக் கட்டுப்படுத்தப்பட்டுள்ளது. இந்த நிதி இடைவெளி (Financial Space), உலகளாவிய விநியோகச் சங்கிலியில் ஏற்படும் தடைகள் மற்றும் விலையேற்றத்தின் தாக்கங்களை உள்நாட்டு சந்தை உணராத வகையில் கட்டுப்படுத்த மத்திய வங்கிக்கு ஏதுவாக அமைந்துள்ளது. எரிபொருள் தட்டுப்பாடு போன்ற பிரச்சினைகள் இனி ஏற்படாது என்றும், தற்போதைய அபாயங்கள் உள்நாட்டு நிதிப் பற்றாக்குறையினால் உருவானவை அல்ல, மாறாக உலகளாவிய விநியோகச் சிக்கல்களால் மட்டுமே ஏற்படுபவை என்றும் ஆளுநர் விளக்கமளித்தார்.
சர்வதேச நாணய நிதியத்தின் (IMF) வேலைத்திட்டம் குறித்துக் குறிப்பிட்ட ஆளுநர், ‘டித்வா’ சூறாவளி மற்றும் காலநிலை மாற்றங்களால் டிசம்பர் மாதத்தில் இடம்பெறவிருந்த மீளாய்வு தாமதமடைந்த போதிலும், மார்ச் 15 ஆம் திகதியளவில் பேச்சுவார்த்தைகள் மீண்டும் தொடங்கும் என நம்பிக்கை வெளியிட்டார். இந்த மீளாய்வின் மூலம், மே மாதத்திற்குள் அடுத்த கட்ட நிதித் தவணையைப் பெற்றுக்கொள்வதை அரசாங்கம் தனது முக்கிய இலக்காகக் கொண்டுள்ளது. சர்வதேச நாணய நிதியத்தின் நிபந்தனைகளுக்கிணங்க, நாட்டின் பொருளாதாரக் கட்டமைப்பை சீர்திருத்தும் பணிகள் தொடர்ந்து முறையாக முன்னெடுக்கப்பட்டு வருகின்றன.
பல்வேறு சவால்கள் நிறைந்த சூழலிலும், இலங்கையின் மொத்த உள்நாட்டு உற்பத்தி (GDP) வளர்ச்சி சுமார் 5 சதவீதமாக இருக்கும் என்று மத்திய வங்கி எதிர்வுகூறியுள்ளது. இது சர்வதேச நாணய நிதியம் முன்னதாக கணித்திருந்த 2 சதவீதத்தை விட மிக அதிகம் என்பது குறிப்பிடத்தக்கது. மத்திய கிழக்கு மோதல்கள் நீண்ட காலம் தொடர்ந்தால் உலகளாவிய வர்த்தகம் பாதிக்கப்படலாம் என்ற போதிலும், இலங்கை தற்போதுள்ள நிதி நிலைமையின்படி அந்த சவால்களை வெற்றிகரமாகக் கையாண்டு, பொருளாதார வளர்ச்சியைத் தொடர்ந்து தக்கவைக்கும் என ஆளுநர் உறுதியளித்தார்.
