நுரைச்சோலை லக்விஜய மின் உற்பத்தி நிலையத்தின் தொடர்ச்சியான செயல்பாட்டை உறுதிப்படுத்தும் நோக்கில், அவசரகால அடிப்படையில் 05 சரக்குக் கப்பல் அளவிற்கான நிலக்கரியைக் கொள்முதல் செய்ய அமைச்சரவை அனுமதி வழங்கியுள்ளது. நாட்டில் நிலவும் எரிசக்தித் தேவையைப் பூர்த்தி செய்யவும், மின் விநியோகத் தடைகளைத் தவிர்க்கவும் இந்தத் தீர்மானம் எடுக்கப்பட்டுள்ளது.
இந்தக் கொள்முதல் நடவடிக்கைக்காக ‘லங்கா கோல்’ (Lanka Coal Company) நிறுவனத்தில் பதிவு செய்யப்பட்ட விநியோகஸ்தர்களிடமிருந்து பகிரங்க ஏலங்கள் கோரப்பட்டன. இதில் மொத்தம் 06 நிறுவனங்கள் தமது விலைமனுக்களைச் சமர்ப்பித்திருந்தன. பெறப்பட்ட ஏலங்களை உயர்மட்ட நிலைக் கொள்முதல் குழு விரிவாக மதிப்பீடு செய்தது.
அதன்படி, மிகவும் குறைந்த ஏலத் தொகையைச் சமர்ப்பித்திருந்த இந்தியாவைச் சேர்ந்த மெஸ்ஸர்ஸ். தரன்ஜோட் ரிசோர்சஸ் (பிரைவேட்) லிமிடெட் (Messrs. Tharanjot Resources Pvt Ltd) நிறுவனத்திற்கு இந்தக் கொள்முதல் கட்டளையை வழங்குவதற்குத் தீர்மானிக்கப்பட்டுள்ளது. இதற்கான பரிந்துரையை எரிசக்தி அமைச்சர் நாடாளுமன்றத்தில் முன்வைத்த நிலையில், அமைச்சரவை அதற்குத் தனது அங்கீகாரத்தை வழங்கியுள்ளது.
சர்வதேச சந்தையில் எரிபொருள் மற்றும் நிலக்கரி விலைகளில் ஏற்பட்டுள்ள மாற்றங்களுக்கு மத்தியில், இந்தப் புதிய கொள்முதல் நுரைச்சோலை மின் உற்பத்தி நிலையத்தின் மின்னுற்பத்தித் திறனைத் தக்கவைக்க உதவும் என எதிர்பார்க்கப்படுகிறது. எதிர்வரும் வாரங்களில் இந்த நிலக்கரி கையிருப்புகள் நாட்டை வந்தடையும் என எரிசக்தி அமைச்சு தெரிவித்துள்ளது.
