தமிழ் சினிமாவின் முன்னணி நடிகரான ரவி மோகன் (முன்னர் ஜெயம் ரவி), தனது மனைவி ஆர்த்தி உடனான விவாகரத்து வழக்கு மற்றும் சமூக வலைதளங்களில் பரவி வரும் விமர்சனங்கள் குறித்துச் சென்னையில் இன்று (மே 16, 2026) செய்தியாளர்களைச் சந்தித்துப் பேசினார். இதன்போது மிகவும் உணர்ச்சிவசப்பட்டுக் கண்ணீர் மல்கப் பேசிய அவர், தனது அமைதியை அனைவரும் பலவீனமாகக் கருதிவிட்டதாகக் குறிப்பிட்டார். மேலும், தனது விவாகரத்து விவகாரம் முழுமையாக முடிவுக்கு வரும் வரை தான் எந்தவொரு புதிய திரைப்படங்களிலும் நடிக்கப் போவதில்லை என்ற அதிரடி முடிவையும் அவர் இதன்போது அறிவித்துள்ளார்.
செய்தியாளர் சந்திப்பில் தொடர்ந்து பேசிய ரவி மோகன், பெயர் குறிப்பிடாமல் “மூன்று எழுத்து இட்லி நடிகை” ஒருவரே தனது குடும்ப வாழ்க்கையைக் கெடுத்ததாகக் கடுமையான குற்றச்சாட்டை முன்வைத்தார். தமக்கும் தனது தோழி கெனிஷாவிற்கும் எதிராகப் போலியான தகவல்களும், செயற்கை நுண்ணறிவு (AI) மூலம் எடிட் செய்யப்பட்ட பதிவுகளும் திட்டமிட்டுப் பரப்பப்படுவதாக அவர் வேதனை தெரிவித்தார். அண்மையில் ஏற்பட்ட தொடர் சைபர் துன்புறுத்தல்கள் காரணமாகத் தனது தோழி கெனிஷா சென்னையை விட்டு வெளியேற நேரிட்டதாகவும், அவர் தனக்குக் கடினமான காலங்களில் உறுதுணையாக இருந்தவர் என்றும் அவர் சுட்டிக்காட்டினார்.
தனது பிள்ளைகளுக்காகவே தான் இதுவரை அமைதி காத்து வந்ததாகக் குறிப்பிட்ட நடிகர், தற்போது தனது குழந்தைகளைத் தன்னைச் சந்திக்க விடாமல் ஆர்த்தி தரப்பினர் தடுத்து வருவதாகக் குற்றம் சாட்டினார். பள்ளிக்குக் கூட பாதுகாவலர்களுடன் பிள்ளைகள் அனுப்பப்படுவதாகவும், ஒரு தந்தையாக அவர்களைச் சந்திக்க முடியாத நிலை தனக்கு ஏற்பட்டுள்ளதாகவும் தெரிவித்தார். அத்தோடு, தனது சம்பாத்தியம் முழுவதும் குடும்பத்திற்காகவே செலவிடப்பட்டதாகவும், தனக்கெனத் தனிப்பட்ட வங்கிக் கணக்கு கூட இல்லை என்றும், தனது திருமண வாழ்க்கை ஆரம்பம் முதலே அச்சுறுத்தல்களுக்கு மத்தியிலேயே நகர்ந்ததாகவும் அவர் விவரித்தார்.
கடந்த 23 வருடங்களாகத் திரையுலகில் உழைத்து, பல வெற்றித் திரைப்படங்களைக் கொடுத்துள்ள தனக்கு இவ்வாறான அவமானங்கள் ஏற்படுத்தப்படுவது வருத்தமளிப்பதாக அவர் குறிப்பிட்டார். தன்னை மிரட்ட நினைப்பவர்கள் நேரடியாகத் தனது அலுவலகத்திற்கு வந்து பேசலாம் என்றும், எவ்வித அச்சுறுத்தல்களுக்கும் தான் அஞ்சப் போவதில்லை என்றும் அவர் எச்சரித்துள்ளார். நடிகர் ரவி மோகனின் இந்த அதிரடியான மற்றும் உணர்ச்சிகரமான பேட்டி தற்போது ஒட்டுமொத்தத் திரையுலகிலும், சமூக வலைதளங்களிலும் பெரும் பரபரப்பை ஏற்படுத்தியுள்ளது.