கூகுள் நிறுவனத்தின் புகழ்பெற்ற மின்னஞ்சல் சேவையான ஜிமெயில் (Gmail) தொடங்கப்பட்டு 22 ஆண்டுகள் நிறைவடையும் நிலையில், பயனர்கள் நீண்டகாலமாக எதிர்பார்த்திருந்த ‘மின்னஞ்சல் முகவரியை மாற்றும்’ (Change Gmail Address) புதிய வசதியை கூகுள் நிறுவனம் இன்று (ஏப்ரல் 01, 2026) உத்தியோகபூர்வமாக அறிமுகப்படுத்தியுள்ளது. இதன் மூலம், 2004-ஆம் ஆண்டு காலப்பகுதியில் உருவாக்கப்பட்ட பழைய அல்லது தர்மசங்கடமான பெயர்களைக் கொண்ட மின்னஞ்சல் முகவரிகளைப் பயனர்கள் இனி எளிதாக மாற்றிக்கொள்ள முடியும்.
கூகுள் நிறுவனத்தின் தலைமை நிர்வாக அதிகாரி (CEO) சுந்தர் பிச்சை இது குறித்துத் தனது ‘X’ (முன்னர் ட்விட்டர்) தளத்தில் பதிவிடுகையில், “2004-ஆம் ஆண்டு ஒரு சிறந்த ஆண்டாக இருந்திருக்கலாம், ஆனால் உங்கள் Gmail முகவரி இன்னும் அதே காலத்திலேயே சிக்கியிருக்க வேண்டிய அவசியமில்லை” எனக் நகைச்சுவையாகக் குறிப்பிட்டுள்ளார். பயனர்கள் தங்களது தற்போதைய கூகுள் கணக்கை (Google Account), தரவுகள் அல்லது சந்தாக்களை (Subscriptions) மாற்றாமலேயே புதியதொரு முகவரியைப் பெற்றுக்கொள்ள முடியும் என்பது இதன் சிறப்பம்சமாகும்.
முகவரியை மாற்றுவது எப்படி?
பயனர்கள் தங்களது Gmail அல்லது கூகுள் கணக்கின் ‘Settings’ பக்கத்திற்குச் சென்று, அங்கு கிடைக்கும் (Available) புதிய முகவரியைத் தேர்வு செய்து மாற்றிக்கொள்ளலாம். தற்போது இந்த வசதி முதற்கட்டமாகக் குறிப்பிட்ட பயனர்களுக்கு மட்டுமே வழங்கப்பட்டுள்ள நிலையில், விரைவில் உலகளாவிய ரீதியில் அனைவருக்கும் கிடைக்கும் என அறிவிக்கப்பட்டுள்ளது.
பழைய முகவரிக்கு என்ன நடக்கும்?
உங்கள் பழைய முகவரி தொடர்ந்து உங்கள் கணக்குடன் இணைக்கப்பட்டே இருக்கும். எனவே, வேறு எவராலும் அந்தப் பெயரைப் பயன்படுத்த முடியாது.
பழைய முகவரிக்கு யாராவது மின்னஞ்சல் அனுப்பினாலும், அது தானாகவே உங்கள் புதிய முகவரியின் Inbox-க்கு வந்து சேரும்.
ஒரே கணக்கில் இரண்டு முகவரிகளையும் பயன்படுத்தி நீங்கள் ‘Sign-in’ செய்துகொள்ள முடியும்.
புதிய ‘AI Inbox’ அம்சம்:
இதேவேளை, மின்னஞ்சல் முகவரி மாற்றத்துடன் “AI Inbox” என்ற புதிய புரட்சிகரமான அம்சத்தையும் கூகுள் அறிமுகப்படுத்தியுள்ளது. இந்த வசதி மின்னஞ்சல்களைத் தானாகவே தரம் பிரிப்பதுடன், முக்கியமான செய்திகளுக்குப் பதிலளிப்பதற்கான ஆலோசனைகளையும் வழங்கும். இந்த ‘AI Inbox’ வசதி தற்போது அமெரிக்காவில் உள்ள குறிப்பிட்ட பயனர்களுக்கு மட்டும் பரீட்சார்த்தமாக அறிமுகப்படுத்தப்பட்டுள்ளமை குறிப்பிடத்தக்கது.
