இலங்கையில் ஒழுங்கமைக்கப்பட்ட குற்றக் கும்பல்களைச் சேர்ந்த ஏழு முக்கிய தலைவர்கள், பூசா உயர் பாதுகாப்புச் சிறையிலிருந்து வெலிசரா கடற்படை முகாமில் புதிதாக அமைக்கப்பட்டுள்ள உயர் பாதுகாப்பு தடுப்புக்காவல் பிரிவிற்கு மாற்றப்பட்டுள்ளனர். இந்த அதிரடி நடவடிக்கை நேற்று மேற்கொள்ளப்பட்டதாக பாதுகாப்பு பிரதி அமைச்சர் அருணா ஜெயசேகர உறுதிப்படுத்தியுள்ளார்.
மாற்றப்பட்ட கைதிகளில் “வெலே சூடா”, “தெமட்டகொட சமிந்த”, “லோக்கு பட்டி”, “மிடிகம ருவன்”, “பேக்ஹோ சமன்”, “ஆர்மி சம்பத்” மற்றும் “மன்ன ரமேஷ்” ஆகிய நன்கு அறியப்பட்ட பாதாள உலகப் பிரமுகர்கள் அடங்குவர். பூசா சிறைச்சாலைக்குள் இருந்துகொண்டே இவர்கள் தொடர்ந்து குற்றச் செயல்களைத் திட்டமிட்டு இயக்கி வருவதாகக் கிடைத்த உளவுத்துறை தகவல்களின் அடிப்படையிலேயே இந்தத் தீர்மானம் எடுக்கப்பட்டுள்ளது.
வெலிசரா கடற்படை முகாமில் உள்ள புதிய சிறைச்சாலையானது அதிநவீன பாதுகாப்பு அம்சங்களுடன், வெளி உலகத்துடனான தொடர்புகளை முழுமையாகத் துண்டிக்கும் வகையில் வடிவமைக்கப்பட்டுள்ளது. அதிக அபாயம் வாய்ந்த குற்றவாளிகளுக்காகவே பிரத்யேகமாக ஒதுக்கப்பட்ட இந்த வசதிக்கு மாற்றப்பட்ட முதல் ஏழு கைதிகள் இவர்களே என்பது குறிப்பிடத்தக்கது.
இந்த இடமாற்றத்தின் மூலம் சிறைக்குள் இருந்து முன்னெடுக்கப்படும் போதைப்பொருள் கடத்தல் மற்றும் ஏனைய ஒழுங்கமைக்கப்பட்ட குற்றங்களைத் தடுக்க முடியும் என பாதுகாப்பு அதிகாரிகள் நம்பிக்கை வெளியிட்டுள்ளனர். அத்துடன், முக்கியத்துவம் வாய்ந்த இந்தக் கைதிகளின் பாதுகாப்பை உறுதிப்படுத்துவதும் இந்த நடவடிக்கையின் மற்றொரு நோக்கமாகும்.
