புதிய நாடாளுமன்றம் அமைப்பதற்கான ஆரம்பகட்ட பணிகளை ஒழுங்கமைக்க வேண்டியுள்ள நிலையில், எதிர்வரும் 18ஆம் திகதி முதல் 22ஆம் திகதி வரை அனைத்து நாடாளுமன்ற ஊழியர்களினதும் விடுமுறைகள் இரத்து செய்யப்பட்டுள்ளன.
இது தொடர்பில் விசேட சுற்றறிக்கை ஒன்றை விடுத்துள்ள நாடாளுமன்றத்தின் பணிப்பாளர் (நிர்வாகம்) இந்திரா திஸாநாயக்க, அந்த வாரத்தில் நாடாளுமன்ற ஊழியர்கள் கட்டாயம் பணிக்கு சமூகமளிக்க வேண்டும் என தெரிவித்துள்ளார்.
இந்த காலப்பகுதியில், புதிய நாடாளுமன்றத்தை நிறுவுவதற்கான பூர்வாங்க பணிகளுக்கு நாடாளுமன்றத்தின் அனைத்து பிரிவுகளும் தயார்படுத்தப்படவுள்ளதாக தெரிவிக்கப்படுகிறது.
இதன் படி, இலங்கையின் 10 ஆவது நாடாளுமன்றம் எதிர்வரும் 21ஆம் திகதி ஆரம்பமாகவுள்ளது.
10 ஆவது நாடாளுமன்றத்திற்கு தெரிவு செய்யப்படும் நாடாளுமன்ற உறுப்பினர்களுக்கு விசேட செயலமர்வு எதிர்வரும் 25, 26 மற்றும் 27 ஆம் திகதிகளில் நடைபெறவுள்ளது.
அதன் போது, புதிய நாடாளுமன்ற உறுப்பினர்களுக்கு நாடாளுமன்ற முறை குறித்து விரிவான அறிவுறுத்தல்கள் வழங்கப்படும்.
இதேவேளை, புதிய பாராளுமன்றத்திற்கு விசேட பாதுகாப்பு வேலைத்திட்டமொன்றை நடைமுறைப்படுத்துவதற்கு நாடாளுமன்றத்தின் தலைவர்கள் தீர்மானித்துள்ளனர்.
