உலகம் முழுவதும் வைரலாகிய ‘லபுபு’ (Labubu) பொம்மைகளைத் தயாரிக்கும் பொப் மார்ட் (Pop Mart) நிறுவனத்தின் உரிமையாளர் வாங் நிங்கின் (Wang Ning) சொத்து மதிப்பு பாரிய வீழ்ச்சியைச் சந்தித்துள்ளது.
38 வயதான வாங் நிங்கின் சொத்து மதிப்பு 27.5 பில்லியன் டொலரிலிருந்து 16.2 பில்லியன் டொலராகக் குறைந்துள்ளது. இது சுமார் 11.3 பில்லியன் டொலர் இழப்பாகும்.
ஹொங்கொங் பங்குச் சந்தையில் பொப் மார்ட் நிறுவனத்தின் பங்குகள் 40% வரை சரிவடைந்துள்ளன. ஒரு பங்கின் விலை 339.80 ஹொங்கொங் டொலரிலிருந்து 200 டொலராக வீழ்ந்துள்ளது.
சமீபத்தில் வெளியான ‘லபுபு 4.0’ பொம்மைகளின் விலையும் 30% சரிவைக் கண்டுள்ளது.
பிளாக்பிங்க் குழுவின் லிசா (Lisa), ரிஹானா மற்றும் கிம் கர்தாஷியன் போன்ற உலகப் புகழ்பெற்ற நட்சத்திரங்கள் இந்தப் பொம்மைகளைச் சேகரித்ததால் இது உலகம் முழுவதும் வைரலானது. ஒரு காலத்தில் அலிபாபா நிறுவனர் ஜாக்-மாவை விட அதிக செல்வந்தராகத் திகழ்ந்த வாங் நிங், தற்போது லபுபு மீதான மோகம் குறைந்து வருவதால் இந்தச் சரிவைச் சந்தித்துள்ளார்.
2026 ஆம் ஆண்டளவில் இந்த வளர்ச்சி வேகம் மேலும் குறையக்கூடும் என ஆய்வாளர்கள் எச்சரித்துள்ளனர். இதனை எதிர்கொள்ள, பொப் மார்ட் நிறுவனம் வெறும் பொம்மை விற்பனையுடன் நின்றுவிடாமல், டிஸ்னி (Disney) போன்ற ஒரு மிகப்பெரிய பொழுதுபோக்கு சாம்ராஜ்யமாக (Entertainment Empire) உருவெடுக்கத் திட்டமிட்டு வருகின்றது.