வடமேற்கு லண்டனின் பிரெண்ட் (Brent) பகுதியில் உள்ள புகழ்பெற்ற கிங்ஸ்பரி உயர்நிலைப் பாடசாலையில், 13 வயது சிறுவன் ஒருவன் தனது சக மாணவர்கள் இருவரை கத்தியால் குத்திய சம்பவம் பெரும் பரபரப்பை ஏற்படுத்தியுள்ளது. நேற்று செவ்வாய்க்கிழமை மதிய உணவு இடைவேளையின் போது நிகழ்ந்த இந்தத் தாக்குதலில், 12 மற்றும் 13 வயதுடைய இரு சிறுவர்கள் படுகாயமடைந்தனர். காயமடைந்தவர்களில் ஒருவரது நிலைமை மிகவும் கவலைக்கிடமாக உள்ளதாக மருத்துவமனை வட்டாரங்கள் தெரிவிக்கின்றன. சுமார் 2,000 மாணவர்கள் பயிலும் ஒரு பாதுகாப்பான கல்வி நிறுவனத்திற்குள் இத்தகைய வன்முறை நிகழ்ந்திருப்பது பெற்றோர் மத்தியில் கடும் அச்சத்தை உருவாக்கியுள்ளது.
சம்பவ இடத்திலிருந்து தப்பி ஓடிய 13 வயது சிறுவனை லண்டன் பொலிஸார் அடுத்த சில மணிநேரங்களில் மடக்கிப் பிடித்து, கொலை முயற்சி வழக்கில் கைது செய்துள்ளனர். தாக்குதலுக்குப் பயன்படுத்தப்பட்ட கத்தியும் அவனிடமிருந்து மீட்கப்பட்டுள்ளது. இந்த வழக்கை லண்டன் மெற்றோபொலிட்டன் பொலிஸாரின் பயங்கரவாத எதிர்ப்புப் பிரிவினர் (Counter Terrorism Command) தற்போது பொறுப்பேற்றுள்ளனர். தாக்குதலின் போது அந்த சிறுவன் மதம் சார்ந்த முழக்கங்களை இட்டதாகச் சில சாட்சிகள் தெரிவித்துள்ள பின்னணியிலேயே, இந்த விசாரணைப் பொறுப்பு பயங்கரவாத எதிர்ப்புப் பிரிவிடம் ஒப்படைக்கப்பட்டுள்ளது.
“தற்போது வரை இது ஒரு பயங்கரவாதச் செயலாக உத்தியோகபூர்வமாக அறிவிக்கப்படவில்லை என்றாலும், தாக்குதலின் சூழலைக் கருத்தில் கொண்டு தீவிரவாதப் பின்னணி குறித்து ஆராய்ந்து வருகிறோம்” எனப் புலனாய்வுப் பிரதானி லூக் வில்லியம்ஸ் தெரிவித்துள்ளார். இந்த அதிர்ச்சிகரமான சம்பவம் குறித்துக் கருத்துத் தெரிவித்துள்ள உள்துறைச் செயலர் சபானா மஹ்மூத் மற்றும் லண்டன் மேயர் சாதிக் கான் ஆகியோர், பாதிக்கப்பட்ட குடும்பங்களுக்காகத் தங்களது பிரார்த்தனைகளைத் தெரிவித்துள்ளதோடு, பொதுமக்களிடம் இருந்து மேலதிக தகவல்களையும் கோரியுள்ளனர்.
பாடசாலை வளாகத்திற்குள் கத்திகள் மற்றும் ஆயுதங்கள் கொண்டு வரப்படுவதைத் தடுக்க மேலதிகப் பாதுகாப்பு நடவடிக்கைகள் மற்றும் உலோகக் கண்டறிவான்களைப் (Metal Detectors) பொருத்த வேண்டும் என்ற கோரிக்கை மீண்டும் வலுத்துள்ளது. பாதிக்கப்பட்ட மாணவர்களுக்கும், இந்தச் சம்பவத்தைக் கண்ணால் கண்ட ஏனைய மாணவர்களுக்கும் தேவையான மனநல ஆலோசனைகளை வழங்க அதிகாரிகள் நடவடிக்கை எடுத்து வருகின்றனர். இந்தச் சம்பவம் லண்டனில் அதிகரித்து வரும் இளம்பருவக் குற்றங்கள் மற்றும் தீவிரவாதத் தூண்டுதல்கள் குறித்த புதிய விவாதத்தை மீண்டும் ஆரம்பித்து வைத்துள்ளது.