அமெரிக்க ஜனாதிபதி டொனால்ட் ட்ரம்ப், தனது உடல்நலம் மற்றும் ஆற்றல் குறித்து எழும் விமர்சனங்களுக்கு ‘தி வோல் ஸ்ட்ரீட் ஜேர்னல்’ (The Wall Street Journal) இதழுக்கு அளித்த சிறப்புப் பேட்டியில் விரிவான விளக்கமளித்துள்ளார்.
கடந்த அக்டோபர் மாதம் ட்ரம்ப் மேற்கொண்ட மருத்துவப் பரிசோதனை குறித்துப் பல ஊகங்கள் வெளியான நிலையில், அவர் பின்வருமாறு தெரிவித்தார்:
தான் மேற்கொண்டது எம்.ஆர்.ஐ (MRI) ஸ்கேன் அல்ல, மாறாக அது ஒரு சிடி ஸ்கேன் மட்டுமே. இதயம் மற்றும் வயிற்றுப் பகுதியில் மேற்கொள்ளப்பட்ட இந்தச் சோதனையின் முடிவுகள் மிகவும் சாதகமாக வந்துள்ளன.
இந்தச் சோதனையைச் செய்துகொண்டதற்காக இப்போது வருத்தப்படுகிறேன். இது எனது எதிர்ப்பாளர்களுக்கு ஒரு ஆயுதமாகிவிட்டது. எனக்கு ஏதோ நோய் இருப்பதாக மக்கள் நினைக்க இது வழிவகுத்துவிட்டது. ஆனால் நான் முற்றிலும் ஆரோக்கியமாக உள்ளேன் என்று அவர் குறிப்பிட்டார்.
வெள்ளை மாளிகைக் கூட்டங்களின் போது அவர் தூங்குவதாகச் சமூக வலைதளங்களில் பரவும் புகைப்படங்களுக்கு ட்ரம்ப் நகைச்சுவையுடன் பதிலளித்தார்.
“நான் கூட்டங்களில் தூங்குவதில்லை. நான் கண்களை இமைக்கும்போதோ அல்லது கண்களுக்குச் சற்று ஓய்வு கொடுக்கும்போதோ எடுக்கப்படும் புகைப்படங்களை வைத்து நான் தூங்குவதாகக் கூறுகிறார்கள். அது வெறும் கண் இமைத்தல் மட்டுமே” என்றார்.
தனது 79 வயதிலும் சுறுசுறுப்பாக இருப்பதற்குக் காரணம் தனது சிறந்த மரபணுக்கள் (Genetics) தான் என அவர் பெருமிதம் கொண்டார். மேலும், தனது கேட்கும் திறன் மிகவும் சிறப்பாக இருப்பதாகவும், தனது இதய ஆரோக்கியம் தனது வயதை விட 14 ஆண்டுகள் இளமையாக இருப்பதாக மருத்துவர்கள் தெரிவித்துள்ளதாகவும் அவர் சுட்டிக்காட்டினார்.
ஜனாதிபதியின் மருத்துவர் ஷான் பார்பபெல்லா (Sean Barbabella) வெளியிட்ட குறிப்பில், ட்ரம்ப்பின் வளர்சிதை மாற்ற ஆரோக்கியம் மற்றும் இதயத் துடிப்பு மிகச்சிறந்த நிலையில் இருப்பதாகவும், அவர் தனது பணிகளை முன்னெடுக்க முழுத் தகுதியுடன் இருப்பதாகவும் உறுதிப்படுத்தியுள்ளார்.