மத்திய கிழக்கு பிராந்தியத்தில் நிலவி வரும் தீவிர போர் பதற்றமான சூழல்களுக்கு மத்தியில், சர்வதேச சந்தையில் கச்சா எண்ணெய் மற்றும் இயற்கை எரிவாயு ஆகியவற்றின் விலைகள் இன்றைய தினம் குறிப்பிடத்தக்க அதிகரிப்பைப் பதிவு செய்துள்ளன. உலகளாவிய எரிசக்தி சந்தை நிலவரப்படி, WTI ரக மசகு எண்ணெய் (West Texas Intermediate) பீப்பாய் ஒன்றின் விலை 67.02 அமெரிக்க டொலராக அதிகரித்துள்ளது.
அதேவேளை, சர்வதேச ரீதியில் அதிகம் பயன்படுத்தப்படும் பிரெண்ட் (Brent) ரக மசகு எண்ணெய் பீப்பாய் ஒன்றின் விலை 72.87 அமெரிக்க டொலராக நிலவுகிறது. மசகு எண்ணெயைத் தொடர்ந்து, இயற்கை எரிவாயுவின் (Natural Gas) விலையிலும் இன்று மாற்றம் ஏற்பட்டுள்ளது. அதன்படி, அதன் விலை 2.859 அமெரிக்க டொலராக அதிகரிப்பைப் பதிவு செய்துள்ளது.
இந்த விலையேற்றம் உலக நாடுகளின் எரிபொருள் இறக்குமதிச் செலவுகளில் கடுமையான தாக்கத்தை ஏற்படுத்தக்கூடும் எனப் பொருளாதார ஆய்வாளர்கள் கருதுகின்றனர். குறிப்பாக, ஈரானுக்கும் அமெரிக்கா/இஸ்ரேலுக்கும் இடையிலான நேரடி மோதல், உலகளாவிய கச்சா எண்ணெய் விநியோகச் சங்கிலியைப் பாதிக்கும் என்ற அச்சம் முதலீட்டாளர்கள் மத்தியில் நிலவுகிறது.
