நடிகர் விஜயின் The Goat படத்தின் தலைப்பில் சனாதனம் உள்ளதாக எம்பி ரவிக்குமார் கூறிய நிலையில் தமிழிசை சௌந்தரராஜன் கருத்து ஒன்றை தெரிவித்துள்ளார்.
நடிகர் விஜய் நடித்துள்ள ‘தி கோட்’ திரைப்படம் இன்று திரையரங்குகளில் வெளியான நிலையில் விடுதலை சிறுத்தைகள் கட்சி எம்பி ரவிக்குமார் படத்தின் தலைப்பை விமர்சனம் செய்துள்ளார்.
இது தொடர்பாக அவர் தனது ட்விட்டர் எக்ஸ் தளத்தில், “விஜய் படத்தின் தலைப்பில் ‘சனாதனம்’? The Greatest of all time என்பது ஒரு சனாதனக் கருத்தில்லையா? ‘காலமெல்லாம் பெரியது இதுதான்’ என்றால் காலம் மாறினாலும் இது மாறாது என்றுதானே அர்த்தம்!
‘என்றும் மாறாதது’ என்பதுதானே ‘சனாதனம்’ என்ற சொல்லின் பொருள்! இதைத் தெரிந்துதான் விஜய் படத்துக்குத் தலைப்பு வைத்தார்களா? எல்லாச் சொல்லும் பொருள் குறித்தனவே (தொல்.சொல். 157)” என்று பதிவிட்டுள்ளார்.
இந்நிலையில் இது தொடர்பாக பாஜகவின் மூத்த தலைவர் தமிழிசை சௌந்தரராஜன் பேசுகையில், “எங்களிடம் தான் சனாதனம் பார்த்தார்கள் என்றால் இப்போது விஜயிடமும் சனாதனம் பார்க்கின்றனர்.
முதலில் எங்களை தாக்கினார்கள். இப்போது தம்பி விஜயை தாக்குகிறார்கள். முதலில் சனாதானம் என்ற வார்த்தைக்கு ரவிக்குமாருக்கு அர்த்தம் தெரியுமா?
இதன் மூலம் அவருக்கு சனாதனம் என்னவென்றால் தெரியாது என்பதை ஒப்புக்கொண்டுள்ளார்” என்றார்.
