எஹெலியகொட நகரில் கட்டுப்பாட்டை இழந்த கார் ஒன்று, வீதியோரம் நிறுத்தி வைக்கப்பட்டிருந்த வாகனங்கள் மீது அடுத்தடுத்து மோதித் தள்ளியதில் 10 பேர் காயமடைந்துள்ளனர். நேற்று (ஏப்ரல் 15) புதன்கிழமை மாலை சுமார் 7.00 மணியளவில் இந்த விபத்து நேர்ந்துள்ளது.
எஹெலியகொட பகுதியூடாகப் பயணித்த கார் ஒன்று, சாரதியின் கட்டுப்பாட்டை இழந்து வீதியோரத்தில் வரிசையாக நின்றுகொண்டிருந்த வாகனங்கள் மீது மோதியுள்ளது. இந்த மோதலின் வேகத்தில் ஒரு மோட்டார் சைக்கிள், மூன்று முச்சக்கர வண்டிகள் மற்றும் இரண்டு கார்கள் என மொத்தம் ஆறு வாகனங்கள் ஒன்றோடு ஒன்று மோதி பலத்த சேதமடைந்தன.
இந்த விபத்தில் வாகனங்களில் இருந்தவர்கள் மற்றும் வீதியோரம் நின்றவர்கள் என சுமார் 10 பேர் காயமடைந்தனர். அவர்கள் அனைவரும் உடனடியாக மீட்கப்பட்டு, சிகிச்சைக்காக எஹெலியகொட ஆதார வைத்தியசாலையில் அனுமதிக்கப்பட்டுள்ளனர். அவர்களில் இருவரது நிலைமை கவலைக்கிடமாக இருப்பதாக வைத்தியசாலை வட்டாரங்கள் தெரிவிக்கின்றன.
கார் சாரதியின் கவனயீனம் அல்லது வாகனத்தில் ஏற்பட்ட தொழில்நுட்பக் கோளாறு விபத்துக்குக் காரணமா என்பது குறித்து எஹெலியகொட பொலிஸார் விரிவான விசாரணைகளை முன்னெடுத்து வருகின்றனர். பண்டிகைக் காலப்பகுதியில் வீதிகளில் வாகன நெரிசல் அதிகமாகக் காணப்படும் நிலையில், சாரதிகள் மிகுந்த அவதானத்துடன் வாகனங்களைச் செலுத்துமாறு பொலிஸார் எச்சரிக்கை விடுத்துள்ளனர்.