இலங்கையிலுள்ள பெரிய மற்றும் நடுத்தர அளவிலான தொழிலதிபர்களின் கோரிக்கையை ஏற்று, அவர்களின் செயல்பாடுகளைத் தடையின்றி முன்னெடுப்பதற்காக விசேட எரிபொருள் அனுமதிப்பத்திர முறையொன்றை அறிமுகப்படுத்துவது குறித்து அரசாங்கம் பரிசீலித்து வருகிறது. தற்போதைய எரிபொருள் ஒதுக்கீடு (Quota) தங்களது தொழிற்சாலைகளை இயக்குவதற்குப் போதுமானதாக இல்லை என உரிமையாளர்கள் முன்வைத்த முறைப்பாடுகளைத் தொடர்ந்தே இந்த நடவடிக்கை எடுக்கப்பட்டுள்ளது.
இது குறித்து கருத்துத் தெரிவித்துள்ள கைத்தொழில் மற்றும் தொழிலக அபிவிருத்தி பிரதி அமைச்சர் சத்துரங்க அபேசிங்க, அமைச்சு மற்றும் இலங்கை பெட்ரோலிய கூட்டுத்தாபனம் (CPC) ஆகியன இணைந்து இதற்கான விசேட பொறிமுறையை உருவாக்கி வருவதாகத் தெரிவித்தார். பெரிய அளவிலான தொழிற்சாலைகளுக்குத் தேவையான எரிபொருள் அளவுகள் தொடர்பான தரவுகள் ஏற்கனவே பெட்ரோலிய கூட்டுத்தாபனத்திடம் சமர்ப்பிக்கப்பட்டுள்ளன.
இதுவரை சுமார் 2,300 தொழிலதிபர்கள் தங்களது எரிபொருள் ஒதுக்கீட்டை அதிகரிக்குமாறு அமைச்சிடம் உத்தியோகபூர்வமாக விண்ணப்பித்துள்ளனர். அதேவேளை, சிறிய மற்றும் குறு அளவிலான (MSME) தொழிலதிபர்கள் தங்களது முந்தைய எரிபொருள் நுகர்வு விபரங்களை அந்தந்த பிரதேச செயலகங்களில் சமர்ப்பிப்பதன் மூலம், தங்களுக்குத் தேவையான மேலதிக ஒதுக்கீடுகளைப் பெற்றுக்கொள்ள வழிவகை செய்யப்பட்டுள்ளது.
இந்த விசேட அனுமதி முறை அமலுக்கு வரும் பட்சத்தில், நாட்டின் உற்பத்தித் துறை மற்றும் ஏற்றுமதி நடவடிக்கைகள் எவ்விதத் தடையுமின்றி முன்னெடுக்கப்படும் என எதிர்பார்க்கப்படுகிறது. எரிபொருள் விநியோகத்தில் நிலவும் சிக்கல்களைக் களைந்து பொருளாதார வளர்ச்சியை உறுதிப்படுத்துவதே இதன் முக்கிய நோக்கமாகும்.
