இலங்கை அணியின் இளம் வேகப்பந்து வீச்சாளர் மதீஷா பத்திரானா, இலங்கை கிரிக்கெட் வாரியம் (SLC) நடத்திய கட்டாய உடற்தகுதித் தேர்வில் வெற்றிகரமாகத் தேர்ச்சி பெற்றுள்ளார். இதன் மூலம், அவர் கொல்கத்தா நைட் ரைடர்ஸ் (KKR) அணியில் இணைவதற்கான தடைகள் நீங்கியுள்ளன.
டி20 உலகக் கோப்பையின் போது ஏற்பட்ட காயம் காரணமாக ஐபிஎல் தொடரின் ஆரம்பப் போட்டிகளில் விளையாட முடியாமல் இருந்த அவர், தற்போது குணமடைந்துள்ளார். சென்னை சூப்பர் கிங்ஸ் (CSK) அணியிலிருந்து 18 கோடி ரூபாய்க்கு கேகேஆர் அணியால் ஏலத்தில் எடுக்கப்பட்ட பத்திரானா, செவ்வாய்க்கிழமை நடைபெறவுள்ள சென்னைக்கு எதிரான போட்டிக்கு முன்னதாக அணியுடன் இணைவார் என எதிர்பார்க்கப்படுகிறது.
தொடர்ச்சியான தோல்விகளால் புள்ளிப்பட்டியலில் பின்தங்கியுள்ள கேகேஆர் அணிக்கு, டெத் ஓவர்களில் சிறப்பாகப் பந்துவீசக்கூடிய பத்திரானாவின் வருகை ஒரு மிகப்பெரிய பலமாக அமையும். எனினும், செவ்வாய்க்கிழமை சென்னைக்கு எதிரான போட்டியிலேயே அவர் விளையாடுவாரா அல்லது வரும் வெள்ளிக்கிழமை (ஏப்ரல் 17) குஜராத் டைட்டன்ஸ் அணிக்கு எதிரான போட்டியில் களமிறங்குவாரா என்பது குறித்து அணி நிர்வாகம் இன்னும் அதிகாரப்பூர்வமாக அறிவிக்கவில்லை.