WWE மல்யுத்தப் போட்டிகளின் ஜாம்பவான்களில் ஒருவரான ஜான் சீனா (John Cena), 23 ஆண்டுகாலச் சேவைக்குப் பிறகு தனது கடைசிப் போட்டியில் தோல்வியைத் தழுவிய நிலையில், WWE போட்டிகளில் இருந்து அதிகாரப்பூர்வமாக ஓய்வு பெற்றார்.
தனது கடைசிப் போட்டியில் ஜான் சீனா, கன்தர் (Gunther) உடன் மோதினார். இந்தப் போட்டியில் ஜான் சீனா ‘டேப் அவுட்’ (Tap Out) முறையில் தோல்வியைத் தழுவினார்.
தோல்வியுடன் ஜான் சீனா WWE போட்டிகளில் இருந்து ஓய்வு பெற்றார். அவரை WWE நட்சத்திரங்கள் மற்றும் ரசிகர்கள் நெகிழ்ச்சியுடன் வழியனுப்பினர்.
2002ஆம் ஆண்டு WWE போட்டிகளில் அறிமுகமான ஜான் சீனா, தனது தனித்துவமான மல்யுத்த உத்திகள் மற்றும் ‘என்ட்ரி’ இசையால் உலகெங்கிலும் ரசிகர்களைக் கவர்ந்தார். இவர் WWE மல்யுத்தப் போட்டிகளில் மொத்தம் 17 முறை சாம்பியன் பட்டம் வென்றுள்ளார்.
ராக் (The Rock), டிரிபிள் எச் (Triple H), ரேண்டி ஆர்ட்டன் (Randy Orton), அண்டர்டேக்கர் (The Undertaker) உள்ளிட்ட WWE ஜாம்பவான்களுடன் இவர் மோதியுள்ளார்.
‘தி சூசைட் ஸ்குவாட்’, ‘ப்ரீலான்ஸ்’ உள்ளிட்ட படங்களிலும் ஜான் சீனா நடித்துள்ளார். அடுத்த கட்டமாக அவர் தனது முழு கவனத்தையும் சினிமா துறையில் செலுத்த உள்ளதாகக் கூறப்படுகிறது.