ஐபிஎல் 2026 தொடரின் தொடக்க ஆட்டத்தில், நடப்பு சாம்பியனான ரோயல் செலஞ்சர்ஸ் பெங்களூரு (RCB) அணி, சன்ரைசர்ஸ் ஹைதராபாத் (SRH) அணியை 6 விக்கெட்டுகள் வித்தியாசத்தில் வீழ்த்தி தனது பட்டத்தைத் தக்கவைக்கும் பயணத்தை வெற்றியுடன் தொடங்கியுள்ளது. பெங்களூரு சின்னசுவாமி மைதானத்தில் சனிக்கிழமை (மார்ச் 28) நடைபெற்ற இந்தப் போட்டியில், நட்சத்திர வீரர் விராட் கோலி மற்றும் தேவ்தத் படிக்கல் ஆகியோரின் அதிரடி ஆட்டத்தால் ஆர்சிபி அணி எளிதாக வெற்றி பெற்றது.
முதலில் துடுப்பெடுத்தாடிய சன்ரைசர்ஸ் ஹைதராபாத் அணி, நிர்ணயிக்கப்பட்ட 20 ஓவர்களில் 9 விக்கெட்டுகளை இழந்து 201 ஓட்டங்களைக் குவித்தது. அந்த அணியின் தற்காலிகத் தலைவர் இஷான் கிஷன் அதிரடியாக விளையாடி 38 பந்துகளில் 80 ஓட்டங்களைப் பெற்றார். ஆர்சிபி அணி சார்பாக அறிமுக வீரர் ஜேக்கப் டஃபி (Jacob Duffy) 22 ஓட்டங்களுக்கு 3 விக்கெட்டுகளைக் கைப்பற்றி அசத்தினார்.
202 ஓட்டங்கள் என்ற கடினமான இலக்கை நோக்கிப் பதிலுக்குத் துடுப்பெடுத்தாடிய ஆர்சிபி அணிக்கு, விராட் கோலி மற்றும் தேவ்தத் படிக்கல் ஜோடி வலுவான அடித்தளமிட்டது. படிக்கல் வெறும் 26 பந்துகளில் 61 ஓட்டங்களைக் குவித்து ஆட்டமிழந்தார். மறுமுனையில் நங்கூரமாக நின்ற விராட் கோலி, 38 பந்துகளில் 5 சிக்ஸர்கள் மற்றும் 5 பவுண்டரிகளுடன் ஆட்டமிழக்காமல் 69 ஓட்டங்களைக் குவித்தார். குறிப்பாக ஹர்ஷல் படேல் வீசிய 16-ஆவது ஓவரில் அடுத்தடுத்து எல்லைக்கோடுகளை விளாசிய கோலி, 15.4 ஓவர்களிலேயே அணியை வெற்றி பெறச் செய்தார்.
வெற்றிக்குப் பிறகு பேசிய விராட் கோலி, “தொடர்ச்சியான போட்டிகளுக்கு மத்தியில் கிடைக்கும் இத்தகைய இடைவெளிகள் என்னை மனரீதியாகப் புத்துணர்ச்சியுடன் வைத்திருக்க உதவுகின்றன. நான் விளையாடும் போது எப்போதும் 120 சதவீத பங்களிப்பை வழங்கவே விரும்புகிறேன்” என்றார். இந்த வெற்றியின் மூலம் ஐபிஎல் வரலாற்றில் இலக்கைத் துரத்தும் போது (Chasing) 4,000 ஓட்டங்களைக் கடந்த முதல் வீரர் என்ற சாதனையையும் கோலி படைத்துள்ளார். ஆர்சிபி அணி தனது அடுத்த போட்டியில் ஏப்ரல் 5-ஆம் திகதி சென்னை சூப்பர் கிங்ஸ் அணியை எதிர்கொள்ளவுள்ளது.