எரிபொருள் விலைத் திருத்தம் செய்யப்பட்டிருந்தாலும், முச்சக்கர வண்டிகளுக்கான கட்டணங்களில் எந்தவிதத் திருத்தமும் மேற்கொள்ளப்படாது என அகில இலங்கை முச்சக்கர வண்டி உரிமையாளர்கள் சங்கம் திட்டவட்டமாக அறிவித்துள்ளது. இதற்கு முறையான அரசாங்க ஒழுங்குமுறை இல்லாததையே காரணமாகச் சங்கம் சுட்டிக்காட்டியுள்ளது.
மாதாந்த எரிபொருள் விலை சூத்திரத்திற்கமைய, நேற்று (ஒக்டோபர் 31) நள்ளிரவு முதல் அமுலாகும் வகையில் லங்கா பெற்றோலிய கூட்டுத்தாபனம், ஒக்டேன் 92 பெற்றோல் ஒரு லீற்றரின் விலையை 5 ரூபாவால் குறைத்தது.
எவ்வாறாயினும், ஏனைய எரிபொருள் வகைகளின் விலைகளில் எவ்வித மாற்றமும் இல்லை என கூட்டுத்தாபனம் தெரிவித்துள்ளது.
இந்த விலைக் குறைப்பு குறித்துக் கருத்துத் தெரிவித்த சங்கத்தின் தலைவர் லலித் தர்மசேகர, விலைக் குறைப்பின் பலன் நுகர்வோருக்குச் சென்றடையாது என்று குறிப்பிட்டார். கட்டணத் திருத்தம் செய்யாததற்கான காரணம் குறித்து
அவர் மேலும் தெரிவிக்கையில்,”நாங்கள் இந்த வழியில் நாற்பதுக்கும் மேற்பட்ட வருடங்கள் வந்துவிட்டோம். மேல் மாகாண சபையின் இறுதிக் கட்டணத் தீர்மானம் என்னவென்றால், அதிகபட்சம் முதல் கிலோமீற்றருக்கு 100 ரூபாய் மற்றும் இரண்டாவது கிலோமீற்றருக்கு 85 ரூபாய். ஆனால், பொதுமக்கள் குறை கூறுகிறார்கள்; சுரண்டல் நடக்கிறது. நாங்கள் தொடர்ந்து நகைப்புக்குரியவர்களாக இருக்கத் தயாராக இல்லை.”
தொடர்ந்து பேசிய அவர், ஒரு வலுவான ஒழுங்குமுறையின் கீழ் விலை கட்டுப்பாடு செய்யப்பட்டால், அது சட்டமாக மாறும். ஒரு நிலையான விலை சூத்திரத்தின் படி சரியான கட்டணத்தைச் சொல்லி, மக்களுக்கு அதைத் தெரியப்படுத்தினால், தற்போதுள்ள அனைத்து மோசடிகளையும் சமன் செய்து இதைப் பின்பற்ற முடியும்.
“இந்த முறையும் கட்டணத்தில் மாற்றம் இல்லை. அடுத்த முறை விலை குறைந்தாலும், அதிகரித்தாலும் திருத்தம் செய்ய மாட்டோம்,” என்று அவர் உறுதியாகத் தெரிவித்தார்.
