நாட்டில் போதிய எரிபொருள் கையிருப்பு இருப்பதாக அரசு உறுதியளித்திருந்த போதிலும், திடீரென எரிபொருள் விலைகளை அதிகரிக்க வேண்டியதன் அவசியத்தை அமைச்சரவை அமைச்சரவை இணைப் பேச்சாளர் அமைச்சர் நளிந்த ஜயதிஸ்ஸ தெளிவுபடுத்தியுள்ளார். சர்வதேச சந்தையில் கச்சா எண்ணெய் விலை சுமார் 37.76 சதவீதம் வரை அதிகரித்துள்ளதுடன், சுத்திகரிக்கப்பட்ட எரிபொருட்களின் விலையும் அதற்கிணையாகப் பெருமளவு உயர்ந்துள்ளது. இந்த உலகளாவிய விலை மாற்றத்தின் நேரடித் தாக்கத்தை இலங்கை எதிர்கொள்ள வேண்டியுள்ளதால், இந்த விலை திருத்தம் தவிர்க்க முடியாததாக மாறியுள்ளதாக அவர் குறிப்பிட்டார்.
கடந்த மார்ச் 1-ஆம் திகதி முதல் 9-ஆம் திகதி வரையான காலப்பகுதியில், நாட்டில் எரிபொருள் நுகர்வு வழமைக்கு மாறாக மிகத் தீவிரமாக அதிகரித்துள்ளதாகத் தரவுகள் காட்டுகின்றன. பொதுவாக ஒரு நாளைக்கு சுமார் 4,000 மெற்றிக் தொன் டீசல் தேவைப்படும் நிலையில், இந்த ஒன்பது நாட்களில் மட்டும் மேலதிகமாக 23,000 மெற்றிக் தொன் டீசலும், 13,000 மெற்றிக் தொன் பெற்றோலும் நுகரப்பட்டுள்ளன. பொதுமக்களிடையே நிலவிய தேவையற்ற அச்சம் காரணமாக ஏற்பட்ட இந்த ‘பீதி கொள்முதல்’ (Panic buying), நாட்டின் எரிபொருள் கையிருப்புகளை மிக விரைவாகத் தீர்த்துவிட்டதாக அமைச்சர் சுட்டிக்காட்டினார்.
புதிய விலைக்கு இறக்குமதி செய்யப்பட்ட எரிபொருள் கப்பல்களின் செலவுகளை ஈடுகட்ட வேண்டிய கட்டாயத்தில் இந்தத் திருத்தம் மேற்கொள்ளப்பட்டுள்ளது. சர்வதேச சந்தையில் விலை உயரும் போது, அதற்கு ஏற்ப உள்நாட்டு விலையைச் சரிசெய்யாவிட்டால், தனியார் நிறுவனங்கள் எரிபொருள் இறக்குமதியைக் குறைத்துக்கொள்ள அல்லது நிறுத்தக்கூடும் என்ற அபாயம் உள்ளது. இது நாட்டின் விநியோகச் சங்கிலியில் பாரிய நெருக்கடியை ஏற்படுத்தும் என்பதால், விநியோகத் தடையின்றித் தொடர்வதை உறுதி செய்ய இந்த நடவடிக்கை எடுக்கப்பட்டதாக அவர் விளக்கமளித்தார்.
பொருளாதார நெருக்கடியைக் கருத்தில் கொண்டு, சர்வதேச சந்தை விலைக்கேற்ப பெரும் விலை உயர்வைச் செய்யாமல், கட்டுப்படுத்தப்பட்ட அளவில் மட்டுமே இந்தத் திருத்தம் மேற்கொள்ளப்பட்டுள்ளதாக அமைச்சர் உறுதியளித்தார். நாட்டில் எரிபொருள் விநியோகம் எந்தத் தடையும் இன்றித் தொடர்வதை அரசு உறுதி செய்வதாகவும், தேவையற்ற நுகர்வைக் குறைத்து எரிபொருளைச் சிக்கனமாகப் பயன்படுத்துமாறு பொதுமக்களிடம் அவர் அன்புடன் கேட்டுக்கொண்டார்.