ஜேர்மனியின் கெல்சென்கிர்ச்சன் (Gelsenkirchen) நகரில் உள்ள பிரபல வங்கி ஒன்றில், மிக நுணுக்கமான முறையில் சுவர் துளையிடப்பட்டு சுமார் 314 கோடி ரூபாய்க்கும் (இலங்கை ரூபாயின் மதிப்பில் பல பில்லியன்) அதிகமான சொத்துக்கள் கொள்ளையடிக்கப்பட்டுள்ளன.
அந்த நகரில் உள்ள ‘ஸ்பார்காஸ்ஸே’ (Sparkasse) என்ற வங்கியிலேயே இந்தக் கொள்ளை நிகழ்ந்துள்ளது.
கிறிஸ்மஸ் பண்டிகையை முன்னிட்டு வங்கிக்கு வழங்கப்பட்ட ஒரு வார கால விடுமுறையைச் சாதகமாகப் பயன்படுத்திய கொள்ளையர்கள், வங்கியின் வாகன நிறுத்துமிடத்திலிருந்து பாதுகாப்புப் பெட்டகங்கள் இருக்கும் நிலவறை வரை சுவரைத் துளையிட்டுள்ளனர்.
நிலவறைக்குள் புகுந்த அவர்கள், சுமார் 3,000க்கும் மேற்பட்ட தனிநபர் பாதுகாப்புப் பெட்டகங்களை உடைத்து, அங்கிருந்த ரொக்கம், தங்கக்கட்டிகள் மற்றும் விலை உயர்ந்த நகைகளைச் சூறையாடியுள்ளனர்.
இந்தக் கொள்ளைச் சம்பவத்தில் மிகத் துல்லியமாகச் செயற்படக்கூடிய ‘தொழில்முறை கொள்ளையர்கள்’ (Professional Thieves) ஈடுபட்டிருக்கலாம் என ஜேர்மன் பொலிஸார் சந்தேகம் வெளியிட்டுள்ளனர். இதுவரை எவரும் கைது செய்யப்படாத நிலையில், சிசிடிவி காட்சிகள் மற்றும் தடயங்களை வைத்துப் பொலிஸார் தீவிர விசாரணைகளை முன்னெடுத்து வருகின்றனர்.
இந்தத் துணிகரக் கொள்ளைச் சம்பவம் ஐரோப்பிய நாடுகளில் பெரும் பரபரப்பை ஏற்படுத்தியுள்ளது.