பாடசாலை மாணவிகளுக்குத் தொடர்ச்சியாக ஆபாச காணொளிகளைக் காண்பித்த குற்றச்சாட்டில், 56 வயதுடைய நபர் ஒருவரை நானுஓயா பொலிஸார் கைது செய்துள்ளனர்.
நானுஓயா பொலிஸ் மகளிர் பணியகத்தினால் பாடசாலை மாணவிகள் மற்றும் தோட்டத் தொழிலாளர்களுக்குச் சிறுவர் துஷ்பிரயோகம் மற்றும் பாலியல் வன்கொடுமை குறித்து விழிப்புணர்வு ஏற்படுத்தும் வேலைத்திட்டம் முன்னெடுக்கப்பட்டது. இதன்போது, பாதிக்கப்பட்ட மாணவிகள் வழங்கிய முறைப்பாடுகளின் அடிப்படையில் இந்தச் சட்டவிரோதச் செயல் வெளிச்சத்திற்கு வந்துள்ளது.
கைது செய்யப்பட்டவர் நானுஓயா பகுதியைச் சேர்ந்த மூன்று பிள்ளைகளின் தந்தை ஆவார். 11 முதல் 14 வயதுக்குட்பட்ட 6 மாணவிகள் இது குறித்து முறைப்பாடு செய்துள்ளனர். அவர்கள் அனைவரும் மருத்துவப் பரிசோதனைகளுக்காக நுவரெலியா மாவட்ட பொது வைத்தியசாலையின் நீதித்துறை மருத்துவ அதிகாரியிடம் (JMO) பரிந்துரைக்கப்பட்டுள்ளனர்.
சந்தேக நபரை நுவரெலியா மாவட்ட நீதவான் முன்னிலையில் இன்று (21) ஆஜர்படுத்துவதற்குப் பொலிஸார் நடவடிக்கை எடுத்துள்ளனர்.
நானுஓயா பொலிஸ் நிலையப் பொறுப்பதிகாரி தலைமைப் பரிசோதகர் ஜனக பண்டார வழிகாட்டலில், பெண்கள் மற்றும் சிறுவர் பிரிவினர் மேலதிக விசாரணைகளை முன்னெடுத்து வருகின்றனர். இவ்வாறான சமூகச் சீர்கேடுகள் குறித்து பொதுமக்கள் மற்றும் மாணவர்கள் அச்சமின்றிப் பொலிஸாருக்குத் தகவல் வழங்க வேண்டும் என அதிகாரிகள் கேட்டுக்கொண்டுள்ளனர்.