கடந்த 2015 ஜனாதிபதித் தேர்தலின் போது ‘சதொச’ நிறுவனம் ஊடாக முறையற்ற வகையில் பலகைகளை இறக்குமதி செய்து, அரச நிதிக்கு சுமார் அறுபது மில்லியன் ரூபா நட்டத்தை ஏற்படுத்தியதாகக் குற்றம் சுமத்தப்பட்டு சிறைத்தண்டனை விதிக்கப்பட்ட முன்னாள் அமைச்சர்களான மஹிந்தானந்த அளுத்கமகே மற்றும் நளின் பெர்னாண்டோ ஆகியோர் தாக்கல் செய்திருந்த மேன்முறையீட்டு மனுக்கள் மீதான விசாரணை, இன்று (மார்ச் 9) உயர் நீதிமன்றத்தில் ஆரம்பமானது. இந்த முக்கிய வழக்கு, நீதியரசர் பிரீத்தி பத்மன் சூரசேன தலைமையிலான ஐவர் கொண்ட நீதியரசர்கள் குழாம் முன்னிலையில் விசாரணைக்கு எடுத்துக்கொள்ளப்பட்டது.
இந்தக் குழாமில் நீதியரசர்களான ஷிரான் குணரத்ன, அர்ஜுன ஒபேசேகர, அச்சல வெங்கப்புலி மற்றும் சம்பத் அபேகோன் ஆகியோர் உள்ளடங்கியுள்ளனர். கடந்த கால வழக்குகளில், 2015 ஜனாதிபதித் தேர்தலின் போது அப்போதைய ஜனாதிபதி வேட்பாளர் மஹிந்த ராஜபக்ஷவின் அரசியல் காரியாலயங்களுக்குத் தேவையான 14,000 கெரம் பலகைகள் மற்றும் 11,000 தாம் பலகைகளை அரச நிறுவனமான ‘சதொச’ ஊடாக இறக்குமதி செய்ததில் மோசடி இடம்பெற்றதாகக் குற்றம் சாட்டப்பட்டிருந்தது.
குறித்த வழக்கினை விசாரித்த கொழும்பு நிரந்தர மேல் நீதிமன்றத்தின் மூன்று நீதியரசர்கள் கொண்ட அமர்வு, குற்றச்சாட்டுகள் நிரூபிக்கப்பட்டதன் பேரில் பிரதிவாதிகளான மஹிந்தானந்த அளுத்கமகேவுக்கு 20 ஆண்டுகள் கடுங்காவல் சிறைத்தண்டனையையும், நளின் பெர்னாண்டோவுக்கு 25 ஆண்டுகள் கடுங்காவல் சிறைத்தண்டனையையும் விதித்துத் தீர்ப்பளித்திருந்தது. இந்தத் தீர்ப்பினைச் சவாலுக்கு உட்படுத்தி, தங்களை விடுவிக்குமாறு கோரி இவர்கள் உயர் நீதிமன்றத்தில் மேன்முறையீட்டு மனுக்களைத் தாக்கல் செய்திருந்தனர்.
இன்று ஆரம்பமான இந்த விசாரணை, அரசியல் வட்டாரங்களிலும் நீதித்துறை சார்ந்தும் பெரும் எதிர்பார்ப்பை ஏற்படுத்தியுள்ளது. சட்டத்தரணிகளின் வாதப்பிரதிவாதங்களை முன்வைக்க உயர் நீதிமன்றம் அனுமதி வழங்கியுள்ள நிலையில், முன்னெடுக்கப்படும் விரிவான விசாரணைகளின் பின்னரே இவர்களது தண்டனை குறித்த இறுதித் தீர்ப்பு அல்லது மேலதிக உத்தரவுகள் பிறப்பிக்கப்படும். இச்சம்பவம் தொடர்பான மேலதிக விபரங்களுக்காக உயர் நீதிமன்றின் அடுத்தகட்ட அமர்வுகளைச் சட்ட வல்லுநர்கள் உன்னிப்பாகக் கவனித்து வருகின்றனர்.