நடுக்கடலில் இலங்கை மீனவர்கள் மீது மர்மத் தாக்குதல்: பின்னணியில் யார்? – தீவிரமடையும் விசாரணை!

சர்வதேசக் கடற்பரப்பில் மீன்பிடி நடவடிக்கையில் ஈடுபட்டிருந்த இலங்கை மீனவர்கள் மீது அடையாளம் தெரியாத மர்மக் கும்பல் நடத்திய கொடூரம், தற்போது நாட்டுக்குள் பெரும் பரபரப்பை ஏற்படுத்தியுள்ளது. திக்கோவிட்ட மீன்பிடித் துறைமுகத்திலிருந்து ‘சந்துன் புதா 04’ (Sandun Putha 04) என்ற பல நாள் மீன்பிடிப் படகில் சென்ற மீனவர்கள், ஆழ்கடலில் வைத்துத் தாக்குதலுக்கு உள்ளாகியுள்ளனர். இந்தத் தாக்குதலில் படுகாயமடைந்த இரு மீனவர்கள், கடற்படையினரால் தெற்கு கடற்பரப்பில் வைத்து மீட்கப்பட்டு, கடந்த பெப்ரவரி 4 ஆம் திகதி கொழும்பு தேசிய வைத்தியசாலையில் மேலதிக சிகிச்சைக்காக அனுமதிக்கப்பட்டுள்ளனர்.

இந்தச் சம்பவம் தொடர்பாகக் பொலிஸ் மா அதிபரின் (IGP) நேரடி உத்தரவின் பேரில் விசேட விசாரணைகள் ஆரம்பிக்கப்பட்டுள்ளதாகக் கடற்றொழில் பிரதி அமைச்சர் ரத்ன கமகே தெரிவித்துள்ளார். இலங்கை கடற்படையினரின் முழுமையான ஒத்துழைப்புடன் இந்த விசாரணைகள் முன்னெடுக்கப்பட்டு வருவதாகவும், நடுக்கடலில் இந்தத் தாக்குதலை நடத்திய மர்மக் கும்பல் யார் என்பது குறித்த விரிவான அறிக்கை விரைவில் கடற்றொழில் அமைச்சிடம் சமர்ப்பிக்கப்படும் என்றும் அவர் உறுதி அளித்துள்ளார். கடலில் சட்டவிரோதச் செயல்களில் ஈடுபடும் குழுக்கள் அல்லது எல்லை தாண்டிய அத்துமீறல்கள் இதில் அடங்கியுள்ளனவா என்ற கோணத்தில் விசாரணைகள் முடுக்கிவிடப்பட்டுள்ளன.

இதேபோன்றதொரு தாக்குதல் சம்பவம் முன்னதாக ‘தினிதி துவ 01’ (Dinithi Duwa 01) என்ற படகில் சென்ற மீனவர்கள் மீதும் நடத்தப்பட்டிருப்பது தெரியவந்துள்ளது. அந்தப் படகில் இருந்து படுகாயமடைந்த நிலையில் மீட்கப்பட்ட மீனவர்கள் காலி, கராபிட்டிய போதனா வைத்தியசாலையில் அனுமதிக்கப்பட்டுச் சிகிச்சை பெற்று வருகின்றனர். குறுகிய கால இடைவெளியில் அடுத்தடுத்து இரு படகுகள் மீது தாக்குதல் நடத்தப்பட்டுள்ளமை, இலங்கை மீனவர்களிடையே பெரும் அச்சத்தையும் கவலையையும் தோற்றுவித்துள்ளது.

இந்தத் தாக்குதல்களில் இந்தியக் கடலோரக் காவல்படை அல்லது இந்தியக் கடற்படைக்குத் தொடர்பு இருக்கலாம் எனச் சமூக வலைத்தளங்களில் சந்தேகங்கள் பரவின. எனினும், கொழும்பிலுள்ள இந்தியத் தூதரகம் இந்தச் செய்திகளை முற்றாக மறுத்துள்ளது. இந்தியக் கடற்படையினரோ அல்லது கடலோரக் காவல்படையினரோ இலங்கை மீனவர்கள் மீது எவ்விதத் தாக்குதல்களையும் நடத்தவில்லை என்று இந்தியத் தூதரகம் திட்டவட்டமாகத் தெரிவித்துள்ளதுடன், இவ்வாறான குற்றச்சாட்டுகளில் எவ்வித உண்மையும் இல்லை எனத் தெளிவுபடுத்தியுள்ளது.

தற்போது காயமடைந்த மீனவர்களிடம் பொலிஸார் வாக்குமூலங்களைப் பெற்று வருவதுடன், அவர்களின் படகுகள் தாக்கப்பட்ட விதம் மற்றும் பயன்படுத்தப்பட்ட ஆயுதங்கள் குறித்தும் ஆராயப்பட்டு வருகிறது. சர்வதேசக் கடல் எல்லையில் நிலவும் பாதுகாப்பற்ற சூழல் குறித்து மீனவ சங்கங்கள் கவலை தெரிவித்துள்ள நிலையில், அரசாங்கத்தின் இந்த விசாரணைகள் மூலம் உண்மையான குற்றவாளிகள் அடையாளம் காணப்படுவார்களா என்ற எதிர்பார்ப்பு அதிகரித்துள்ளது.