காவல்துறையில் உள்ள மிக மூத்த அதிகாரிகளின் பதவிகள் மற்றும் கடமைகள் மாற்றியமைக்கப்படவுள்ளதாகக் காவல்துறை தலைமையக வட்டாரங்கள் தெரிவிக்கின்றன. காவல்துறை மா அதிபருக்கு எதிராக அவதூறு பிரசாரம் செய்ததாகக் கூறப்படும் மூத்த அதிகாரி மீதான விசாரணைகள் தொடங்கப்பட்டவுடன் இந்த இடமாற்றங்கள் நடைபெறும் என எதிர்பார்க்கப்படுகிறது.
இந்தநிலையில், லலித் பத்திநாயக்க நிர்வாகத்திற்கான காவல்துறை மூத்த டிஐஜி பதவியில் இருந்து நீக்கப்பட்டு, மத்திய மாகாணத்திற்குப் பொறுப்பான மூத்த டிஐஜியாக நியமிக்கப்பட்டுள்ளார்.
சஞ்சீவ தர்மரத்ன காவல் நிர்வாகப் பிரிவின் தலைவராக நியமிக்கப்படவுள்ளதாகக் காவல்துறை வட்டாரங்கள் தெரிவிக்கின்றன.
சஞ்சீவ மெதவத்த மேல் மாகாணத்திற்குப் பொறுப்பான புதிய மூத்த டிஐஜியாக நியமிக்கப்படவுள்ளார். திலக் தனபால வடக்கு மாகாணத்திற்குப் பொறுப்பான மூத்த டிஐஜி பதவியிலிருந்து வட மத்திய மாகாணத்திற்கு மாற்றப்பட உள்ளார்.
புத்திக சிறிவர்தன வட மாகாணத்திற்குப் பொறுப்பான மூத்த டிஐஜியாக மாற்றப்பட உள்ளார்.இந்த மறுசீரமைப்பு காவல்துறை நிர்வாகத்தில் புதிய மாற்றங்களைக் கொண்டுவரும் என்று எதிர்பார்க்கப்படுகிறது.
