சிறிலங்கா ஜனநாயக சோசலிசக் குடியரசின் நாடாளுமன்ற அமர்வு அடுத்த வாரம் டிசம்பர் 18ஆம் திகதி காலை 9.30 மணிக்குக் கூட்டப்படும் எனச் சபாநாயகர் ஜகத் விக்ரமரத்ன அறிவித்துள்ளார்.
பிரதமர் ஹரிணி அமரசூரியவின் கோரிக்கைக்கு அமைய இந்த அமர்வுக்குச் சபாநாயகர் அழைப்பு விடுத்துள்ளார்.
நாடாளுமன்ற நிலையியற் கட்டளை 16இற்கு அமைவாகச் சபாநாயகரால் இந்த அழைப்பு விடுக்கப்பட்டுள்ளது. இது தொடர்பான அதிவிசேட வர்த்தமானி அறிவித்தல் (இலக்கம் 2466/33) நேற்று (டிசம்பர் 12) வெளியிடப்பட்டுள்ளது.
அண்மையில் வீசிய ‘டித்வா’ புயல் காரணமாகப் பாதிக்கப்பட்ட மக்களுக்கு நிவாரணங்களை வழங்குவதற்கும் உரிய நடவடிக்கைகளை எடுப்பதற்காகவும் நாடாளுமன்றத்தைக் கூட்டுமாறு சிறிலங்கா பொதுஜன பெரமுனவின் நாடாளுமன்ற உறுப்பினர் நாமல் ராஜபக்ச அண்மையில் பிரதமரிடம் கோரிக்கை விடுத்திருந்தார் என்பது குறிப்பிடத்தக்கது. இந்தக் கோரிக்கையும் அமர்வு கூட்டப்படுவதற்கான முக்கிய காரணங்களில் ஒன்றாகும்.
