கேகாலை மாவட்டத்தில் றம்புக்கனை – மாவனல்லை வீதியில் அமைந்துள்ள 100 ஆண்டுகள் பழமை வாய்ந்த வரலாற்றுச் சிறப்புமிக்க கடிகமுவ பாலத்தைப் புனரமைக்கும் பணிகள் தற்போது உத்தியோகபூர்வமாக ஆரம்பிக்கப்பட்டுள்ளன. பழைமை மாறாத அழகிய தோற்றத்தைக் கொண்ட இந்தப் பாலத்தின் ஊடாக தற்போது பெரிய ரக வாகனங்கள் அல்லது கண்டெய்னர் ஊர்திகள் பயணிக்க முடியாத நிலை காணப்படுகிறது. இதனால் சுற்றுலாப் பயணிகள் மற்றும் வணிக ரீதியான போக்குவரத்துப் பாதிப்படைந்து வந்த நிலையில், நீண்டகால கோரிக்கையை ஏற்று இந்தப் புனரமைப்புப் பணிகள் முன்னெடுக்கப்படுகின்றன.
மத்திய அதிவேக நெடுஞ்சாலையின் கொழும்பு முதல் றம்புக்கனை வரையிலான பகுதி 2027 ஆம் ஆண்டு திறக்கப்படவுள்ள நிலையில், இப்பகுதியில் எதிர்காலத்தில் ஏற்படக்கூடிய கடும் வாகன நெரிசலைக் கருத்திற்கொண்டு இந்தத் திட்டம் விரைவுபடுத்தப்பட்டுள்ளது. பாலத்தின் ஒடுக்கமான அமைப்பு காரணமாக கனரக வாகனங்கள் மாற்று வழிகளை நாட வேண்டிய சூழல் நிலவுகிறது. இதனைத் தவிர்க்கும் வகையில், போக்குவரத்துப் பிரதி அமைச்சர் பிரசன்ன குணசேகர அவர்களின் வழிகாட்டலில் உரிய அதிகாரிகள் மற்றும் பொறியியலாளர்களுடன் விரிவான ஆலோசனைகள் நடத்தப்பட்டு இந்தப் பணிகள் ஆரம்பிக்கப்பட்டுள்ளன.
இந்தப் புனரமைப்புத் திட்டத்தின் கீழ், பாலத்தின் தற்போதைய வரலாற்றுத் தோற்றம் மாறாமல் அப்படியே பாதுகாக்கப்பட்டு, அதே இடத்தில் பாலம் அகலப்படுத்தப்படவுள்ளது. குறிப்பாக மலைநாட்டு ரயில் பாதையை மீண்டும் முழுமையாகத் திறப்பதற்கு முன்னதாகவே இந்தப் பாலத்தை நவீன வசதிகளுடன் நிர்மாணிக்கத் திட்டமிடப்பட்டுள்ளது. இதற்காக நவீன தொழில்நுட்பங்கள் பயன்படுத்தப்படுவதுடன், எதிர்வரும் மூன்று மாத காலப்பகுதிக்குள் கட்டுமானப் பணிகளை முழுமையாக நிறைவு செய்ய இலக்கு நிர்ணயிக்கப்பட்டுள்ளது.
இந்தத் திட்டம் நிறைவடைவதன் மூலம் றம்புக்கனை மற்றும் மாவனல்லை பகுதிகளுக்கு இடையிலான போக்குவரத்துச் சீராகும் என எதிர்பார்க்கப்படுகிறது. மேலும், சுற்றுலாப் பேருந்துகள் தடையின்றிப் பயணிக்க முடிவதால் இப்பகுதியின் சுற்றுலாத் துறையும் வளர்ச்சி அடையும். வரலாற்றுச் சின்னங்களைப் பாதுகாத்துக் கொண்டே நவீனத் தேவைகளைப் பூர்த்தி செய்யும் வகையில் முன்னெடுக்கப்படும் இந்தச் செயல்முறைக்கு அப்பகுதி மக்கள் மற்றும் வாகனச் சாரதிகள் தங்களது வரவேற்பைத் தெரிவித்துள்ளனர்.
