இலங்கை போக்குவரத்து சபையில் வரலாற்று சாதனை: முதல் முறையாக வீதியில் இறங்கினர் பெண் நடத்துனர்கள்!

இலங்கை போக்குவரத்து சபையின் (SLTB) வரலாற்றில் முதல் முறையாக நியமிக்கப்பட்ட பெண் நடத்துனர்கள் இன்று (10) உத்தியோகபூர்வமாகத் தமது பணிகளை ஆரம்பித்துள்ளனர். கொட்டாவ, மாகும்புர பல்நோக்கு போக்குவரத்து மத்திய நிலையத்தில் (Makumbura MMC) இருந்து ஆரம்பமான இந்தப் புதிய பயணம், இலங்கையின் பொதுப் போக்குவரத்துத் துறையில் பாலின சமத்துவத்தை நோக்கிய ஒரு பாரிய பாய்ச்சலாகக் கருதப்படுகிறது. அண்மையில் நியமனம் பெற்ற 19 பெண் நடத்துனர்களும் இன்று தமது கடமைகளைப் பொறுப்பேற்று, அரச பேருந்துகளில் பயணிகளுக்கான சேவையை விறுவிறுப்பாகத் தொடங்கியுள்ளனர்.

இந்த வரலாற்றுச் சிறப்புமிக்க மாற்றமானது, போக்குவரத்துத் துறை அமைச்சர் பிமல் ரத்நாயக்கவின் வழிகாட்டலில், பொதுப் போக்குவரத்தில் பெண்களுக்கு எதிரான துன்புறுத்தல்களைத் தடுக்கும் நோக்குடனும் முன்னெடுக்கப்பட்டுள்ளது. புதிதாக நியமிக்கப்பட்ட இந்த வீராங்கனைகளுக்கு எனப் பிரத்யேகமான சீருடைகள் அறிமுகப்படுத்தப்பட்டுள்ளதுடன், அவர்கள் ஆரம்பத்தில் மாகும்புர மற்றும் கடவத்தை இடையிலான அதிவேக வீதிப் பேருந்து சேவைகளில் ஈடுபடுத்தப்படவுள்ளனர். “ஆண்களுக்கு நிகராகப் பெண்களும் எதனையும் சாதிக்க முடியும்” என்பதை நிரூபிக்கும் வகையில் அமைந்துள்ள இந்த நடவடிக்கை, எதிர்காலத்தில் பாடசாலை பேருந்து சேவைகளிலும் விரிவுபடுத்தப்படும் என எதிர்பார்க்கப்படுகிறது.