இங்கிலாந்தின் உயர்கல்வி புள்ளிவிவர நிறுவனம் (HESA) வெளியிட்டுள்ள சமீபத்திய தரவுகள், சர்வதேச மாணவர்களின் கல்விப் பயணத்தில் ஒரு பாரிய சரிவு ஏற்பட்டுள்ளதை உறுதிப்படுத்தியுள்ளன. 2024/25 ஆம் கல்வி ஆண்டில் பிரித்தானியாவிற்குள் கல்வி கற்கும் மாணவர்களின் எண்ணிக்கை 685,565 ஆகக் குறைந்துள்ளதோடு, வெளிநாடுகளில் இருந்து வழங்கப்படும் UK திட்டங்களில் சேருபவர்களின் எண்ணிக்கை 6% வீழ்ச்சியடைந்துள்ளது. குறிப்பாக, 2023 ஆம் ஆண்டில் அறிமுகப்படுத்தப்பட்ட கடுமையான விசா விதிமுறைகள், இலங்கை போன்ற நாடுகளைச் சேர்ந்த மாணவர்களைக் கடுமையாகப் பாதித்துள்ளன.
செப்டம்பர் 2025 இல் முடிவடைந்த ஆண்டில் மாணவர் விசாக்களின் எண்ணிக்கை 439,924 ஆகப் பதிவாகியுள்ளது. இது 2023 ஆம் ஆண்டின் உச்சகட்ட எண்ணிக்கையை விட 31% குறைவு என்பது குறிப்பிடத்தக்கது.
புதிய விசா விதிகளின்படி, மாணவர்கள் தங்களது குடும்ப உறுப்பினர்களை (Dependents) அழைத்து வருவதற்கு விதிக்கப்பட்ட கட்டுப்பாடுகளால், சார்ந்திருப்பவர்களின் எண்ணிக்கை 57% வரை சரிந்துள்ளது.
இலங்கை மாணவர்களின் நிலை: இந்த விசா கொள்கை மாற்றத்தால் இலங்கையிலிருந்து முதுகலை (Postgraduate) படிப்புகளுக்கு விண்ணப்பிப்போரின் எண்ணிக்கை 36% சரிவைச் சந்தித்துள்ளது. சர்வதேச அளவில் மாணவர் வருகை குறைந்த நாடுகளில் இலங்கை இரண்டாவது இடத்தில் உள்ளது.
மாற்றுப் பாதைகளைத் தேடும் மாணவர்கள்: குடும்பத்தினரைத் தங்களுடன் அழைத்துச் செல்ல முடியாத சூழல் ஏற்பட்டதால், பல இலங்கை மாணவர்கள் பிரித்தானியாவிற்குச் செல்வதைத் தவிர்த்து வருகின்றனர். இதற்கு மாற்றாக, அவர்கள் கனடா மற்றும் ஆஸ்திரேலியா போன்ற நாடுகளைத் தேர்வு செய்கின்றனர். அல்லது, குடும்பத்தினரை அழைத்துச் செல்ல அனுமதி வழங்கும் ஆராய்ச்சிப் படிப்புகளுக்கு (Research Degrees) மாறுகின்றனர்.
பிரித்தானிய அரசு 2028 ஆம் ஆண்டு முதல் சர்வதேச மாணவர்களுக்கான புதிய ‘சர்வதேச மாணவர் வரியை’ (International Student Levy) அறிமுகப்படுத்தவுள்ளது. இது பல்கலைக்கழகங்களின் ஆட்சேர்ப்பு உத்திகளில் மேலும் மாற்றங்களை ஏற்படுத்தும் என எதிர்பார்க்கப்படுகிறது. இதனால் பிரித்தானியா தனது முதன்மை கல்விச் சந்தை அந்தஸ்தைத் தக்கவைத்துக் கொள்ளப் போராடி வரும் சூழல் உருவாகியுள்ளது.