யாழ்ப்பாணம் காங்கேசன்துறை ஊரணி கடற்பகுதியில் கடந்த வெள்ளிக்கிழமை மீன்பிடிக்கச் சென்ற நிலையில் காணாமல் போன இரண்டு மீனவர்கள், ஏழு நாட்களுக்குப் பிறகு தமிழ்நாடு அரியமான் கடற்பரப்பில் வைத்து இந்திய கடலோரக் காவல் படையினரால் பாதுகாப்பாக மீட்கப்பட்டுள்ளனர். இயந்திரக் கோளாறு காரணமாகக் கடலில் தத்தளித்த இவர்களது படகு, காற்றின் திசையாலும் கடல் அலையாலும் இந்திய எல்லைக்குள் அடித்துச் செல்லப்பட்ட நிலையில் இந்த மீட்பு நடவடிக்கை இடம்பெற்றுள்ளது.
கடந்த வாரம் மீன்பிடிக்கச் சென்றபோது இவர்களது படகு நடுப்பகுதியில் பழுதடைந்துள்ளது. இதனைத் தற்செயலாகக் கவனித்த இந்திய மீனவர்கள் சிலர், மனிதாபிமான அடிப்படையில் அவர்களது விசைப்படகு மூலம் பழுதடைந்த படகை இழுத்துச் சென்று, மீனவர்களுக்குத் தேவையான உணவு மற்றும் குடிநீரை வழங்கியுள்ளனர். பின்னர், அவர்களை இலங்கை கடல் எல்லையின் ஓரத்தில் விட்டுச் சென்றதாகத் தெரியவருகிறது.
இருப்பினும், படகின் இயந்திரக் கோளாறு முழுமையாகச் சரி செய்யப்படாததாலும், கடலில் நிலவிய கடும் காற்று மற்றும் அலைகளின் தாக்கத்தினாலும் அவர்களது படகு மீண்டும் கட்டுப்பாட்டை இழந்து இந்திய கடல் எல்லைக்குள் இழுத்துச் செல்லப்பட்டது. சுமார் ஏழு நாட்களாகக் கடலில் தத்தளித்த இந்த மீனவர்கள், இறுதியாகத் தமிழ்நாட்டின் வடக்குக் கடற்கரைப் பகுதியான அரியமான் பகுதியில் கரை ஒதுங்கியுள்ளனர்.
தற்போது தமிழ்நாடு கடலோரக் காவல் படையினரின் பொறுப்பில் உள்ள இந்த இரு மீனவர்களும் ஆரோக்கியமாக இருப்பதாகத் தகவல்கள் தெரிவிக்கின்றன. அவர்களை மீண்டும் இலங்கைக்கு அழைத்து வருவதற்கான இராஜதந்திர ரீதியான பேச்சுவார்த்தைகள் மற்றும் சட்ட நடைமுறைகளை இலங்கை கடற்படை மற்றும் வெளிவிவகார அமைச்சு அதிகாரிகள் முன்னெடுத்து வருகின்றனர். விரைவில் அவர்கள் முறைப்படி இலங்கை அதிகாரிகளிடம் ஒப்படைக்கப்படுவார்கள் என எதிர்பார்க்கப்படுகிறது.