இஸ்ரேலுடன் நிலுவையில் உள்ள பிரச்சினைகளைத் தீர்க்க, இரு தரப்புக்களுக்குமிடையே விசேட பேச்சுவார்த்தை ஒன்றை முன்னெடுக்க வேண்டும் என லெபனான் ஜனாதிபதி ஜோசப் அவுன் (Joseph Aoun) தெரிவித்துள்ளார். மேலும், தற்போது நடைபெற்றுள்ள காஸா போர் எந்த நேர்மறையான முடிவுகளுக்கும் வழிவகுக்கவில்லை எனவும் அவர் சுட்டிக்காட்டியுள்ளார்.
இரண்டு ஆண்டுகளுக்கும் மேலாக நீடித்த முந்தைய காஸா போரில், இஸ்ரேலுக்கும் ஹமாஸுக்கும் இடையே ஒரு போர் நிறுத்த ஒப்பந்தத்தை நடைமுறைக்குக் கொண்டுவர அமெரிக்க ஜனாதிபதி டொனால்ட் டிரம்ப் மத்தியஸ்தம் செய்திருந்தார்.
இஸ்ரேல் – ஹமாஸ் போர் தொடங்கிய ஒரு நாளுக்குப் பிறகு, லெபனானின் ஹிஸ்புல்லா அமைப்பு, காஸாவிற்குக் காப்புப் படை என்று கூறி எல்லையில் உள்ள இஸ்ரேலிய இராணுவ நிலைகளைத் தாக்கத் தொடங்கியது.
இந்த மோதல் கிட்டத்தட்ட ஒரு வருடம் கழித்து முழு அளவிலான சண்டையாகத் தீவிரமடைந்தது. இதன் போது ஹிஸ்புல்லா குழு பெரும் இழப்புகளைச் சந்தித்ததுடன், அதன் அரசியல் மற்றும் இராணுவத் தளபதிகள் பலர் கொல்லப்பட்டனர்.
14 மாத இஸ்ரேல்-ஹிஸ்புல்லா போர் நவம்பரில் அமெரிக்க மத்தியஸ்தத்துடன் முடிவடைந்ததிலிருந்து, இஸ்ரேல் லெபனான் மீது கிட்டத்தட்ட தினசரி வான்வழித் தாக்குதல்களை நடத்தி வருவதாகக் கூறப்படுகிறது.
அமெரிக்கா மற்றும் ஐக்கிய நாடுகள் சபையின் மத்தியஸ்தத்துடன் லெபனான் கடந்த காலங்களில் இஸ்ரேலுடன் பேச்சுவார்த்தை நடத்தியுள்ளது. இந்தப் பேச்சுவார்த்தைகள் இரு நாடுகளுக்கும் இடையே 2022 ஆம் ஆண்டு கடல் எல்லை ஒப்பந்தத்திற்கு வழிவகுத்தன என்று அவுன் கூறினார்.
“அமைதி மற்றும் ஸ்திரத்தன்மையை அடைவதற்கான பேச்சுவார்த்தைகளை நோக்கி நிலைமைகள் நகர்கின்றன என்று நான் நம்புகிறேன். எனவே, உரையாடல் மற்றும் பேச்சுவார்த்தைகள் மூலம் தீர்வுகளை எட்ட முடியும் என்று நாங்கள் கூறுகிறோம்,” என லெபனான் ஜனாதிபதி ஜோசப் அவுன் வலியுறுத்தினார்.