மத்திய கிழக்கில் அமெரிக்கா மற்றும் இஸ்ரேலின் கூட்டுத் தாக்குதல்களால் ஈரானின் உச்ச தலைவர் அயதுல்லா அலி கமேனி கொல்லப்பட்டதைத் தொடர்ந்து, இரு நாடுகளுக்கும் இடையிலான மோதல் புதிய பரிமாணத்தை எட்டியுள்ளது. ஆயுதப் போர் ஒருபுறம் தீவிரமடைந்திருக்க, மறுபுறம் இணையதளங்களில் இரு நாடுகளும் ‘அனிமேஷன்’ மற்றும் ‘ஃபேன் ஃபிக்ஷன்’ பாணியிலான காணொளிகள் மூலம் விசித்திரமான இராஜதந்திரப் போரைத் தொடங்கியுள்ளன. தங்களின் சித்தாந்தங்களை நிலைநாட்டவும், பொதுமக்களின் கவனத்தை ஈர்க்கவும் இந்த டிஜிட்டல் ஊடகங்களை இரு நாடுகளும் தீவிரமாகப் பயன்படுத்தி வருகின்றன.
கடந்த மார்ச் 6-ஆம் திகதி, அமெரிக்க வெள்ளை மாளிகை “Justice the American Way” என்ற பெயரில் ஒரு அதிரடி காணொளியை வெளியிட்டிருந்தது. ஹொலிவுட் திரைப்படங்களின் பாணி, வீடியோ கேம் காட்சிகள் மற்றும் உயர்தர அனிமேஷன் நுட்பங்களுடன் உருவாக்கப்பட்ட அந்தக் காணொளி, அமெரிக்காவின் இராணுவ வலிமையையும் அதன் இலக்குகளையும் வெளிப்படுத்தும் வகையில் அமைந்திருந்தது. இது சர்வதேச அரங்கில் பெரும் விவாதங்களைக் கிளப்பியிருந்த நிலையில், அதற்குப் பதிலடி கொடுக்கும் விதமாக ஈரான் தற்போது களமிறங்கியுள்ளது.
ஈரான் அரசு, தனது உச்ச தலைவர் அயதுல்லா அலி கமேனியின் ‘தியாகத்தைப்’ போற்றும் வகையிலும், அவரின் கொள்கைகளைச் சித்தரிக்கும் வகையிலும் பிரத்யேக அனிமேஷன் காணொளிகளை வெளியிட்டுள்ளது. ‘ஃபேன் ஃபிக்ஷன்’ (Fan Fiction) எனப்படும் இந்த பாணியிலான படைப்புகள், சமூக வலைதளங்களில் ஈரானிய ஆதரவாளர்களிடையே பெரும் வரவேற்பைப் பெற்றுள்ளன. அதிநவீன ஏவுகணைகள் மற்றும் போர் விமானங்களின் மோதல்களுக்கு மத்தியில், இணையதளங்களில் நடைபெறும் இந்த ‘கிராபிக்ஸ்’ போர், நவீன காலப் போர்முறையின் புதிய அடையாளமாக மாறியுள்ளது.
இராணுவ மோதல்கள் களத்தில் நடைபெற்றுக்கொண்டிருக்கும் வேளையில், டிஜிட்டல் தளத்தில் நடைபெறும் இந்த மோதல்கள், இளைஞர்களைக் கவரும் முயற்சியாகவே பார்க்கப்படுகின்றன. தகவல் தொழில்நுட்பம் மற்றும் மென்பொருள் நுட்பங்களை அரசியல் பிரச்சாரங்களுக்குப் பயன்படுத்தும் இந்த விசித்திரமான இராஜதந்திரப் போர், இரு நாடுகளுக்கும் இடையிலான உறவில் ஏற்பட்டுள்ள விரிசலை மேலும் அதிகப்படுத்தியுள்ளது. வரலாற்றின் வடுக்களைக் கொண்ட மோதல்கள், தற்போது டிஜிட்டல் திரைகளில் காட்சிகளாக மாற்றப்பட்டுப் பிரசாரம் செய்யப்படுவது சர்வதேச சமூகத்திடையே பெரும் அதிர்வலைகளை ஏற்படுத்தியுள்ளது.
