இஸ்ரேல் – ஹமாஸ் போரின் மிகக் கொடூரமான அத்தியாயங்களில் ஒன்றாக, 2023-இல் அல்-ஷிஃபா மருத்துவமனையிலிருந்து எகிப்திற்கு வெளியேற்றப்பட்ட 11 பச்சிளங்குழந்தைகள், இரண்டு ஆண்டுகளுக்குப் பிறகு காசாவில் உள்ள தங்களது பெற்றோருடன் மீண்டும் இணைந்துள்ளனர். ஐக்கிய நாடுகள் சபையின் (UN) ஏற்பாட்டில் நடைபெற்ற இந்த மீட்புப் பணியானது, போரினால் சிதைந்த குடும்பங்களுக்கு மத்தியில் ஆனந்தக் கண்ணீரையும் பெரும் கொண்டாட்டத்தையும் ஏற்படுத்தியுள்ளது. 2023 நவம்பரில் இஸ்ரேலியப் படைகள் மருத்துவமனையைச் சூழ்ந்தபோது, உயிருக்குப் போராடிய நிலையில் பெற்றோரின்றி எகிப்திற்கு அனுப்பப்பட்ட 29 குறைமாதக் குழந்தைகளில் இவர்களும் அடங்குவர்.
இந்தக் குழந்தைகளில் ஒருவரான பிஸ்ஸானின் தாய் சுந்தஸ் அல்-குர்த், தனது மகளை இரண்டு ஆண்டுகளுக்குப் பிறகு முதல்முறையாக அணைத்தபோது உணர்ச்சிவசப்பட்டார். “இது ஒரு புதிய பிறந்தநாள் போன்றது; அவளுக்கு மறுக்கப்பட்ட அனைத்தையும் நான் ஈடு செய்வேன்” என்று அவர் கூறினார். 2023 அக்டோபரில் எட்டு மாத கர்ப்பிணியாக இருந்தபோது வான்வழித் தாக்குதலில் காயமடைந்த அல்-குர்திற்கு, அவசரச் சிகிச்சை மூலம் பிஸ்ஸான் பிறந்தார். அந்தத் தாக்குதலில் பிஸ்ஸானின் சகோதரி உட்பட குடும்ப உறுப்பினர்கள் 10 பேர் உயிரிழந்த நிலையில், தற்போது இந்தக் குழந்தையின் வருகை அக்குடும்பத்திற்குப் பெரும் மருந்தாக அமைந்துள்ளது.
எகிப்திற்குக் கொண்டு செல்லப்பட்ட 29 குழந்தைகளில் 7 குழந்தைகள் சிகிச்சை பலனின்றி உயிரிழந்ததாக மருத்துவர்கள் தெரிவித்துள்ளனர். தற்போது காசாவிற்குத் திரும்பியுள்ள 11 குழந்தைகள் தவிர, ஏனையோர் வெளிநாடுகளில் உள்ள தங்களது உறவினர்களுடன் இணைந்துள்ளனர். தற்போது காசா நகரில் உள்ள தற்காலிகக் கூடார முகாம்களில் வசிக்கும் இந்தப் பெற்றோர்கள், தங்களை யாரென்று அறியாத மழலைகளுக்குத் தின்பண்டங்கள் மற்றும் பலூன்களை வழங்கி மெதுவாகத் தங்களை அறிமுகப்படுத்தி வருகின்றனர். காலப்போக்கில் குழந்தைகள் தங்களை அடையாளம் கண்டுகொள்வார்கள் என்ற நம்பிக்கையில் அவர்கள் உள்ளனர்.
அமெரிக்காவின் மத்தியஸ்தத்தில் ஏற்பட்ட ஒப்பந்தத்தின் மூலம் எல்லைக் கடக்க அனுமதி வழங்கப்பட்டதாலேயே இந்த நெகிழ்ச்சியான நிகழ்வு சாத்தியமானது. இருப்பினும், காசாவின் மருத்துவக் கட்டமைப்பு மற்றும் பச்சிளங்குழந்தைகள் பராமரிப்புப் பிரிவுகள் போரினால் முற்றாக அழிந்துள்ள நிலையில், இந்தக் குழந்தைகளுக்குத் தேவையான அத்தியாவசிய மருந்துகள் மற்றும் ஊட்டச்சத்து உணவுகளுக்குப் பெரும் தட்டுப்பாடு நிலவுவதாக அல்-ஷிஃபா மருத்துவமனையின் இயக்குநர் முகமது அபு செல்மியா கவலை வெளியிட்டுள்ளார். 75 சதவீதத்திற்கும் அதிகமான மருத்துவப் பொருட்கள் கிடைக்காத நிலையில், இக்குழந்தைகளின் எதிர்கால ஆரோக்கியம் ஒரு பெரும் சவாலாகவே உள்ளது.
