நானுஓயா கிரிமிட்டி தோட்டத்தில் இன்று (12) பிற்பகல் தேயிலை மலையில் கொழுந்து பறித்துக் கொண்டிருந்த பெண் தொழிலாளி ஒருவர் குளவிக் கொட்டுக்கு இலக்காகி சம்பவ இடத்திலேயே உயிரிழந்துள்ளார்.
கிரிமிட்டி தோட்டத்தைச் சேர்ந்த 78 வயதுடைய இரண்டு பிள்ளைகளின் தாயாரே இவ்வாறு உயிரிழந்துள்ளார்.
தொழிலாளர்கள் குழுவாக இணைந்து தேயிலை மலையில் வேலை செய்துகொண்டிருந்தபோது, அருகில் இருந்த மரம் ஒன்றிலிருந்த குளவிக் கூட்டை கழுகு ஒன்று கொத்தி கலைத்துள்ளது. இதனால் ஆவேசமடைந்த குளவிகள் அங்கிருந்த தொழிலாளர்கள் மீது சரமாரியாகத் தாக்குதல் நடத்தியுள்ளன.
குளவிகளின் கடுமையான தாக்குதலுக்கு உள்ளான குறித்த வயோதிபப் பெண், சிகிச்சை பலனின்றி சம்பவ இடத்திலேயே உயிரிழந்தார்.
உயிரிழந்த பெண்ணின் சடலம் தற்போது நுவரெலியா மாவட்ட பொது வைத்தியசாலையில் பிரேத பரிசோதனைக்காக வைக்கப்பட்டுள்ளது. இச்சம்பவம் குறித்து நானுஓயா பொலிஸார் மேலதிக விசாரணைகளை முன்னெடுத்து வருகின்றனர்.
