சர்ச்சைக்குரிய மதுபான உற்பத்தி உரிமம் குறித்து விவாதிக்க கிங்ஸ்பரி ஹோட்டலில் ஒரு தொழிலதிபரைச் சந்தித்ததாக நாடாளுமன்ற உறுப்பினர் சாணக்கியன் இராசமாணிக்கம் (Shanakiyan Rasamanickam) கூறிய குற்றச்சாட்டைப் பிரதி அமைச்சர் சதுரங்க அபேசிங்க (Chathura Senaratne) நிராகரித்துள்ளார்.
நாடாளுமன்றத்தில் ஒரு சிறப்புரிமைப் பிரச்சினையை எழுப்பிய பிரதி அமைச்சர் அபேசிங்க, நாடாளுமன்ற உறுப்பினர் சாணக்கியனின் கருத்துக்களால் தனது நாடாளுமன்றச் சிறப்புரிமைகள் மீறப்பட்டுள்ளதாகவும், சபாநாயகர் தகுந்த நடவடிக்கை எடுக்குமாறு வலியுறுத்தியுள்ளார்.
அவர் கூறுகையில், “பொது அதிகாரிகளாக, முதலீட்டாளர்கள் மற்றும் சாத்தியமான முதலீடுகளில் ஆர்வமுள்ள தனிநபர்களை நாங்கள் தினமும் சந்திப்போம். நாடாளுமன்ற உறுப்பினர் சாணக்கியன் கூறிய கலந்துரையாடல் ஒருபோதும் நடக்கவில்லை, எனக்கு அப்படி ஒரு கடிதம் ஒருபோதும் கிடைக்கவில்லை. யூடியூபில் தோன்றும் விடயங்களைப் பிரபலப்படுத்த நாடாளுமன்றத்தைப் பயன்படுத்த வேண்டாம் என்று உறுப்பினர்களை நான் கேட்டுக்கொள்கிறேன்,” என்று குறிப்பிட்டார்.
ஒப்பந்தம் செய்வதை முடிவுக்குக் கொண்டுவந்து வெளிப்படைத்தன்மையை உறுதி செய்வதற்காகவே தான் அரசியலில் நுழைந்ததாகவும் பிரதி அமைச்சர் கூறியுள்ளார்.
இந்தக் கூற்றுக்குப் பதிலளித்த நாடாளுமன்ற உறுப்பினர் சாணக்கியன், பிரதி அமைச்சரின் கருத்துக்கள் தனிப்பட்ட அறிக்கையா அல்லது சிறப்புரிமைக் குழுவிற்கு அனுப்பப்பட வேண்டிய விஷயமா என்று கேள்வி எழுப்பியுள்ளார்.
மேலும், பிரதி அமைச்சர் தனிப்பட்ட அறிக்கைகளை வெளியிடுவதன் மூலம் பொறுப்புக்கூறலைத் தவிர்க்கக்கூடாது என்றும் அவர் கேட்டுக்கொண்டுள்ளார்.
குறித்த விடயத்தை விசாரிக்கவும், சிசிடிவி காட்சிகளை ஆராயவும், தொடர்புடைய கடிதத்தை மறுபரிசீலனை செய்யவும் அரசாங்கத்தை வலியுறுத்துவதாகவும் சாணக்கியன் தெரிவித்துள்ளார்.
இந்த வாரத் தொடக்கத்தில், நாடாளுமன்ற உறுப்பினர் சாணக்கியன், பிரதி அமைச்சர் அபேசிங்கவும் நாடாளுமன்ற உறுப்பினர் நஜித் இந்திகவும் கிங்ஸ்பரி ஹோட்டலில் ஒரு தொழிலதிபரைச் சந்தித்து சர்ச்சைக்குரிய மதுபான உற்பத்தி உரிமம் குறித்துக் கலந்துரையாடியதாகக் குற்றஞ்சாட்டியிருந்தார்.
