கிழக்கு சீன கடல் பகுதியில், ஆசியாவிலேயே மிகப்பெரிய அளவிலான கடலுக்கடியிலான தங்கப் படிமத்தைச் சீனா கண்டுபிடித்துள்ளது. இந்த முக்கிய கண்டுபிடிப்பின் மூலம் சீனாவின் தங்கக் கையிருப்பு கணிசமாக உயர்ந்துள்ளது.
சீனாவின் ஷான்டாங் மாகாணம், யாண்டாய் நகரில் உள்ள லைஜோ (Laizhou) கடற்கரைக்கு அப்பால் கடலுக்கு அடியில் இந்தப் படிமம் கண்டறியப்பட்டுள்ளது. இந்தப் புதிய கண்டுபிடிப்புடன் சேர்த்து லைஜோ பகுதியின் ஒட்டுமொத்த தங்க இருப்பு 39 இலட்சம் கிலோவுக்கும் அதிகமாக உயர்ந்துள்ளது.
இது சீனாவின் ஒட்டுமொத்த தேசிய தங்க இருப்பில் சுமார் 26 சதவீதமாகும். இதன் மூலம் சீனாவின் தங்கம் உற்பத்தி மற்றும் இருப்பு ஆகிய இரண்டிலும் லைஜோ பகுதி முதலிடத்தைப் பிடித்துள்ளது.
உலகில் அதிக தங்கம் உற்பத்தி செய்யும் நாடாகச் சீனா இருந்தாலும், கையிருப்பில் ஆபிரிக்கா மற்றும் அவுஸ்திரேலியாவுக்குப் பின்னாலேயே உள்ளது. இதனால் 2021 முதல் புதிய படிமங்களைக் கண்டுபிடிப்பதில் சீனா தீவிரம் காட்டி வருகிறது:
கடந்த ஆண்டு லியானிங் மாகாணத்தில் 14.44 இலட்சம் கிலோ தங்கம் கண்டுபிடிக்கப்பட்டது. ஜின்ஜியாங் உய்குர் மலைப்பகுதியில் 10 இலட்சம் கிலோ தங்கம் கண்டுபிடிக்கப்பட்டது.
இந்தத் தொடர் கண்டுபிடிப்புகள் சர்வதேசத் தங்கச் சந்தையில் சீனாவின் ஆதிக்கத்தை மேலும் வலுப்படுத்தும் என எதிர்பார்க்கப்படுகிறது.