பாடசாலைகளுக்கு அரசாங்கத்தினால் வழங்கப்படும் ஸ்மார்ட் பலகைகளுக்காக (Smart Boards) பெற்றோரிடம் நிதி வசூலிப்பதைத் தற்காலிகமாக அல்ல, உடனடியாக நிறுத்துமாறு பிரதமர் ஹரிணி அமரசூரிய பணிப்புரை விடுத்துள்ளார்.
எதிர்க்கட்சித் தலைவர் சஜித் பிரேமதாச எழுப்பிய கேள்விகளுக்குப் பதிலளித்த பிரதமர், கல்வி மறுசீரமைப்பு தொடர்பான பல வதந்திகளுக்கும் முற்றுப்புள்ளி வைத்தார்.
கல்வி அமைச்சினால் பாடசாலைகளுக்கு ஸ்மார்ட் பலகைகள் விநியோகிக்கப்பட்டு வருகின்றன. இதற்காகப் பாடசாலை மட்டத்தில் பெற்றோரிடம் நிதி வசூலிக்கப்படுவது சட்டவிரோதமானது. இவ்வாறான செயற்பாடுகளை உடனடியாக நிறுத்துமாறு அவர் கோரியுள்ளார்.
இலவசக் கல்வியைக் கட்டுப்படுத்தவோ அல்லது ஸ்ரீ ஜயவர்தனபுர பல்கலைக்கழகத்தின் பல் மருத்துவ பீடத்தை மூடுவதற்கோ அரசாங்கம் எவ்வித தீர்மானமும் எடுக்கவில்லை என அவர் உறுதியாகத் தெரிவித்தார்.
1 முதல் 5 ஆம் தரம் வரையிலான மாணவர்களுக்கு தகவல் தொழில்நுட்பம் (IT) ஒரு தனிப்பாடமாகக் கற்பிக்கப்படாது. மாறாக, தொழில்நுட்ப உலகத்துடன் மாணவர்களைப் பழக்கப்படுத்தும் வகையில், வயதுக்கு ஏற்ற தொழில்நுட்ப அறிவை வழங்குவது குறித்து நிபுணர்களுடன் ஆலோசிக்கப்பட்டு வருகிறது.
தொழில்நுட்ப அறிவை மாணவர்களுக்குப் பாடச்சுமையாக மாற்றாமல், நவீன உலகுடன் அவர்கள் இணைந்து பயணிப்பதற்கான வழிமுறைகளை உருவாக்குவது குறித்துக் கல்வியியலாளர்களுடன் கலந்துரையாடல்கள் ஆரம்பிக்கப்பட்டுள்ளதாகப் பிரதமர் மேலும் சுட்டிக்காட்டினார்.