2026 ஜனவரி மாதத்திற்கான கொழும்பு நுகர்வோர் விலைச்சுட்டெண் (CCPI) மற்றும் பணவீக்க விகிதங்களைத் தொகைமதிப்பு மற்றும் புள்ளிவிபரத் திணைக்களம் அதிகாரபூர்வமாக வெளியிட்டுள்ளது. இதன்படி, கொழும்பு நகர்ப்புற சமூகத்தின் ஒட்டுமொத்தப் பணவீக்கம் கடந்த மாதத்துடன் ஒப்பிடுகையில் சிறிய அளவிலான உயர்வைப் பதிவு செய்துள்ளது.
2026 ஜனவரி மாதத்தில் நுகர்வோர் பணவீக்க விகிதம் 2.3% ஆக அதிகரித்துள்ளது. இது 2025 டிசம்பர் மாதத்தில் பதிவான 2.1% ஐ விட 0.2% அதிகமாகும்.
உணவுப் பொருட்களுக்கான பணவீக்கம் 2025 டிசம்பரில் 3.0% ஆக இருந்த நிலையில், ஜனவரியில் 3.3% ஆக உயர்ந்துள்ளது. கடல் மீன், பால் மா, மற்றும் கோழி இறைச்சி ஆகியவற்றின் விலை அதிகரிப்பு இதற்கு முக்கிய காரணமாகக் கூறப்படுகிறது.
கல்வி, சுகாதாரம் மற்றும் வீட்டு வாடகை போன்ற உணவு அல்லாத பிரிவுகளின் பணவீக்கம் எவ்வித மாற்றமுமின்றி 1.8% என்ற நிலையிலேயே தொடர்கிறது.
2024 ஜூலை மாதத்திற்குப் பிறகு பதிவான மிக உயர்ந்த பணவீக்க விகிதம் இதுவாகும். கடந்த நவம்பர் மாதத்தில் ஏற்பட்ட ‘டித்வா’ (Dithwa) புயல் மற்றும் வெள்ளப்பெருக்கு காரணமாகப் பயிர்ச் சேதங்கள் ஏற்பட்டதும், சந்தைக்கு உணவுப் பொருட்கள் வருவது குறைந்ததும் இந்த விலையேற்றத்திற்கு ஒரு காரணமாக ஆய்வாளர்களால் பார்க்கப்படுகிறது.