அமெரிக்க ஜனாதிபதி டொனால்ட் ட்ரம்ப்பினால் இலங்கைக்கான புதிய தூதுவராகப் பரிந்துரைக்கப்பட்ட எரிக் மேயர், செனட் வெளிவிவகாரக் குழுவின் முன் சாட்சியமளித்தபோது, அமெரிக்க அரசாங்கம் இலங்கையில் கவனம் செலுத்தவுள்ள மூன்று முக்கிய இலக்குகளைத் தெளிவுபடுத்தினார்.
உலகளாவிய முக்கிய கப்பல் வழித்தடங்களின் மத்தியில் அமைந்துள்ள இலங்கையின் மூலோபாய இருப்பிடம், ‘சுதந்திரமான மற்றும் திறந்த இந்தோ-பசுபிக்’ கொள்கைக்கு மையமாக உள்ளது.
அமெரிக்கக் கப்பல்கள் மற்றும் உலகின் மசகு எண்ணெய் போக்குவரத்து இங்கு நடைபெறுவதால், இலங்கையின் கடல்சார் பாதுகாப்பை உறுதிசெய்வது அமெரிக்காவுக்கு முக்கியமாகும்.
இந்து சமுத்திர பிராந்தியத்தில் சீனாவின் வளர்ந்து வரும் செல்வாக்கு உட்பட எதிர்ப்புச் செல்வாக்குகளை எதிர்கொள்வது அமெரிக்காவின் முக்கிய இலக்காகும் என எரிக் மேயர் குறிப்பிட்டார்.
ஹம்பாந்தோட்டை துறைமுக விடயத்தில் சீனா நடந்துகொண்ட விதத்தை செனட் குழுத் தலைவர் விமர்சித்தபோது, அமெரிக்கா “திறந்த மற்றும் வெளிப்படையான” உறவுகளை ஆதரிப்பதாகவும், துறைமுகங்கள் உட்பட இறையாண்மையை நிலைநாட்ட இலங்கைக்கு ஆதரவளிப்பதாகவும் எரிக் மேயர் பதிலளித்தார்.
2022ஆம் ஆண்டு பொருளாதார நெருக்கடியில் இருந்து மீண்டு வரும் இலங்கையைப் பிராந்திய பொருளாதாரத் தலைமையாக மாற்றுவதற்கு அமெரிக்கா ஆதரவளிக்கும்.
பொருளாதார இறையாண்மையின் முக்கியத்துவத்தைக் கருதி, சர்வதேச நாணய நிதியத்துடன் (IMF) இணைக்கப்பட்ட மறுசீரமைப்புகளைத் தொடர இலங்கை அரசாங்கத்தை வலியுறுத்தவுள்ளதாகவும் அவர் உறுதியளித்தார்.
சமீபத்திய ‘டித்வா’ சூறாவளிக்கு அமெரிக்கா 2 மில்லியன் டொலர் அவசர உதவியை வழங்கியது, இது இலங்கையுடனான வலுவான கூட்டாண்மையை நிரூபிப்பதாகவும் அவர் குறிப்பிட்டார்.
பேரிடர் நிவாரணம், ஆட்கடத்தல் தடுப்பு, கடல்சார் விழிப்புணர்வு மற்றும் துறைமுகப் பாதுகாப்பு போன்ற விடயங்களில் அமெரிக்கா தனது பாதுகாப்பு மற்றும் சட்ட அமுலாக்க ஒத்துழைப்பை இலங்கையுடன் அதிகரிக்கும் என்றும் எரிக் மேயர் உறுதியளித்துள்ளார்.
