பவதாரிணி மறைவு.. இலங்கையில் நடைபெறவிருந்த இளையராஜா இசைநிகழ்ச்சி ரத்து

பவதாரிணி மறைவு.. இலங்கையில் நடைபெறவிருந்த இளையராஜா இசைநிகழ்ச்சி ரத்து

பவதாரிணி மறைவால், இலங்கையில் நடைபெறுவதாக இருந்த இளையராஜா இசை நிகழ்ச்சி காலவரையின்றி ஒத்தி வைக்கப்பட்டுள்ளது.

இசையமைப்பாளர் இளையராஜாவின் மகளும், பாடகியுமான பவதாரணி (47) புற்றுநோய் காரணமாக நேற்று இலங்கையில் உயிரிழந்தார். இவர், கடந்த 6 மாதங்களாகவே இலங்கையில் தங்கி ஆயுர்வேத சிகிச்சை பெற்றுவந்த நிலையில் சிகிச்சை பலனின்றி உயிரிழந்தார்.

இந்நிலையில், அவரது உடல் இலங்கையில் இருந்து விமானம் மூலம் சென்னைக்கு கொண்டு வரப்பட்டது. அங்கிருந்து, சென்னை தி நகரில் இருக்கும் இளையராஜாவின் இல்லத்திற்கு கொண்டு செல்லப்பட்டுள்ளது.

அங்கு, திரையுலகினர் மற்றும் பொதுமக்களின் அஞ்சலிக்காக வைக்கப்படும். பின்னர், இன்று இரவு சொந்த ஊரான தேனிக்கு கொண்டு செல்லப்படும் என தகவல்கள் வெளிவந்துள்ளது.

இந்நிலையில், நாளை மற்றும் நாளை மறுநாள் இலங்கை கொழும்புவில் நடைபெற இருந்த இளையராஜாவின், ‘என்றும் ராஜா ராஜாதான்’ என்ற இசை நிகழ்ச்சி ஒத்தி வைக்கப்பட்டுள்ளது.

இதற்காக, இலங்கை சென்றிருந்த அவர் மகளின் இறப்பு செய்தி கேட்டதும் மருத்துவமனைக்கு சென்றார். இந்நிலையில், இளையராஜாவின் இசைநிகழ்ச்சி காலவரையின்றி ஒத்தி வைக்கப்பட்டுள்ளதாக நிகழ்ச்சியின் ஒருங்கிணைப்பாளர்கள் அறிவித்துள்ளதாக தகவல்கள் வெளிவந்துள்ளது.