விமலுக்கு 73 – கம்மன்பிலவுக்கு 78

அமைச்சுப் பதவிகளிலிருந்து நீக்கப்பட்ட விமல் வீரவன்ச மற்றும் உதய கம்மன்பில ஆகியோருக்கு நாடாளுமன்றத்தில் பின்வரிசை ஆசனங்கள் வழங்க நடவடிக்கை எடுக்கப்பட்டுள்ளது.

இதன்படி விமல் வீரவன்சவுக்கு 73ஆம் இலக்க ஆசனமும், உதய கம்மன்பிலவுக்கு 78 ஆம் இலக்க ஆசனமும் வழங்கப்பட்டுள்ளது என நாடாளுமன்ற படைக்கல சேவிதர் நரேந்திர பெர்னாண்டோ தெரிவித்துள்ளார்.

புதிய தொழில் அமைச்சராக நியமிக்கப்பட்டுள்ள எஸ்.பி. திஸாநாயக்கவுக்கு வழங்கப்பட்டிருந்த பின்வரிசை இருக்கைக்குப் பதிலாக ஆளும் கட்சியின் இரண்டாவது ஆசனம் வழங்கப்பட்டுள்ளது எனவும், போக்குவரத்து அமைச்சராகப் பொறுப்பேற்றுள்ள திலும் அமுனுகமவுக்கு 30 ஆவது ஆசனம் வழங்கப்பட்டுள்ளது எனவும் அவர் கூறியுள்ளார்.

மீண்டும் இராஜாங்க அமைச்சுப் பொறுப்பை ஏற்றுள்ள அருந்திக்க பெர்னாண்டோவுக்கு ஆளும் கட்சியின் 36 ஆவது ஆசனம் வழங்கப்பட்டுள்ளது எனவும் நாடாளுமன்ற படைக்கல சேவிதர் மேலும் குறிப்பிட்டுள்ளார்.

#SriLankaNews