நடிகர் விஜய்யின் அரசியல் வருகை மற்றும் அவரது தனிப்பட்ட வாழ்க்கை குறித்த வதந்திகள் சமூக வலைதளங்களில் தொடர்ந்து விவாதப் பொருளாகி வருகின்றன. குறிப்பாக, சமீபத்தில் நடந்த பொது மேடை ஒன்றில் இயக்குநர் லட்சுமி ராமகிருஷ்ணன் பேசிய கருத்துக்கள், நடிகர் விஜய்யின் குடும்ப விவகாரங்கள் மற்றும் திரிஷாவுடனான வதந்திகளுடன் தவறாக இணைக்கப்பட்டன. இது குறித்துப் பரவலான விமர்சனங்கள் எழுந்த நிலையில், தற்போது லட்சுமி ராமகிருஷ்ணன் தனது சமூக வலைதளப் பக்கத்தில் விரிவான விளக்கத்தை அளித்துள்ளார்.
தன்னுடைய கருத்து தவறாகப் புரிந்துகொள்ளப்பட்டுள்ளதாகக் குறிப்பிட்டுள்ள லட்சுமி ராமகிருஷ்ணன், “விஜய்யின் தனிப்பட்ட வாழ்க்கை அல்லது அவருடைய அரசியல் வருகை குறித்து நான் எந்தக் கருத்தையும் இதுவரை வெளியிடவில்லை. அவரை நான் ஒரு மரியாதையான, அமைதியான மற்றும் மென்மையான சக நடிகராக மட்டுமே அறிவேன். அதேபோல், அவருடைய தாயார் மீதும் எனக்கு மிகுந்த மரியாதை உண்டு” என்று தனது நிலைப்பாட்டைத் தெளிவுபடுத்தியுள்ளார். மேலும், தேர்தல் நேரத்தில் இதுபோன்ற தனிப்பட்ட விவகாரங்கள் மிகைப்படுத்தப்படுவதாகவும், மக்கள் அரசியல் செயல்பாடுகளையும் தனிப்பட்ட வாழ்க்கையையும் தனித்தனியாகப் பார்க்கத் தெரிந்தவர்கள் என்றும் அவர் சுட்டிக்காட்டியுள்ளார்.
பெண்களின் பாதுகாப்பு மற்றும் உரிமைகள் குறித்துத் தொடர்ந்து குரல் கொடுத்து வரும் லட்சுமி ராமகிருஷ்ணன், இத்தகைய வதந்திகளில் கவனம் செலுத்துவதை விட, சமுதாயத்தில் அடிப்படை வசதிகள் இன்றி, சட்ட மற்றும் பொருளாதார ஆதரவு இல்லாமல் தவிக்கும் பல பெண்களின் துயரங்களுக்குக் குரல் கொடுப்பதே உண்மையான அக்கறையாக இருக்கும் என்று வலியுறுத்தியுள்ளார். தனது விளக்கத்தை வெறும் வதந்திகளுக்கு முற்றுப்புள்ளி வைக்கவே வெளியிட்டிருப்பதாகவும் அவர் குறிப்பிட்டுள்ளார்.
விஜய்யின் குடும்ப வாழ்க்கை மற்றும் விவாகரத்து தொடர்பான வதந்திகள் கடந்த சில வாரங்களாகவே இணையத்தில் வைரலாகி வருகின்றன. பல்வேறு பிரபலங்கள் மற்றும் ஊடகங்கள் இது தொடர்பாகத் தொடர்ச்சியாகக் கருத்துக்களைப் பதிவிட்டு வரும் நிலையில், தற்போது லட்சுமி ராமகிருஷ்ணனின் இந்த நேரடி விளக்கம் சமூக வலைதளங்களில் ஒரு முக்கியமான விவாதத்தை உருவாக்கியுள்ளது. தேவையில்லாத புரிதல்களைத் தவிர்த்து, உண்மையான சமூகப் பிரச்சினைகளில் கவனம் செலுத்த வேண்டும் என்ற அவரது கருத்தை ஒரு தரப்பினர் வரவேற்று வருகின்றனர்.
