இயக்குநர் சுதா கொங்கரா இயக்கத்தில், நடிகர் சிவகார்த்திகேயன் நடிப்பில் உருவான ‘பராசக்தி’ திரைப்படத்தின் அதிகாரப்பூர்வ முன்னோட்டம் இன்று வெளியாகி சமூக வலைதளங்களில் புயலைக் கிளப்பி வருகிறது.
1960-களின் தமிழகத்தைப் பிரதிபலிக்கும் வகையில், குறிப்பாக 1964-ஆம் ஆண்டின் வரலாற்றுச் சிறப்புமிக்க ஹிந்தி எதிர்ப்புப் போராட்டத்தை மையமாகக் கொண்டு இப்படம் உருவாக்கப்பட்டுள்ளது.
இந்திய தொடருந்து (Railway) நிலையத்தில் நிலக்கரி அள்ளும் தொழிலாளியாக சிவகார்த்திகேயன் நடித்துள்ளார். ஆரம்பத்தில் போராட்டங்களில் ஈடுபடத் தயங்கும் அவர், பின்னர் மாணவர் சக்தியுடன் இணைந்து போராட்டத்தை வழிநடத்தும் காட்சிகளை முன்னோட்டம் காட்டுகிறது.
“நாங்கள் ஹிந்தி பேசுபவர்களுக்கு எதிரானவர்கள் அல்ல; ஹிந்தி திணிப்புக்குத்தான் எதிரானவர்கள்” என சிவகார்த்திகேயன் பேசும் வசனம் ரசிகர்களிடையே பெரும் தாக்கத்தை ஏற்படுத்தியுள்ளது.
சிவகார்த்திகேயனின் தம்பியாக அதர்வா முரளியும், தமிழ் சினிமாவில் அறிமுகமாகும் ஸ்ரீலீலா ‘ரத்னமாலா’ எனும் கதாபாத்திரத்திலும் நடித்துள்ளனர்.
நடிகர் ரவி மோகன் (ஜெயம் ரவி) இப்படத்தில் வில்லனாகத் தோன்றுவது எதிர்பார்ப்பைக் கூட்டியுள்ளது. இது இசையமைப்பாளர் ஜி.வி. பிரகாஷ் குமாரின் 100-வது திரைப்படமாகும்.
பொங்கல் பண்டிகையை முன்னிட்டு எதிர்வரும் ஜனவரி 10 ஆம் திகதி திரையரங்குகளில் வெளியாகிறது. தளபதி விஜய்யின் இறுதிப் படமாகக் கருதப்படும் ‘ஜனநாயகன்’ (ஜனவரி 9) படத்துடன் ‘பராசக்தி’ நேரடியாக மோதவுள்ளது.
அரசியல் மற்றும் வரலாற்றுப் பின்னணி கொண்ட இந்தத் திரைப்படம், சிவகார்த்திகேயனின் திரைப்பயணத்தில் ஒரு முக்கியமான மைல்கல்லாக இருக்கும் எனத் திரையுலக விமர்சகர்கள் கருதுகின்றனர்.
