இலங்கைக்கு வருகை தரும் சர்வதேச சுற்றுலாப் பயணிகளுக்கான இலத்திரனியல் பயண அனுமதி (Electronic Travel Authorization – ETA) திட்டம், இந்த ஆண்டின் முதலாவது காலாண்டிற்குள் (Quarter 1) முழுமையாக நடைமுறைப்படுத்தப்படும் என வெளிவிவகார அமைச்சர் விஜித ஹேரத் தெரிவித்துள்ளார்.
இந்தத் திட்டம் கடந்த ஆண்டே அறிமுகப்படுத்தப்பட்ட போதிலும், பல்வேறு காரணங்களால் இதுவரை உத்தியோகபூர்வமாகச் செயல்படுத்தப்படவில்லை என்பதை அமைச்சர் சுட்டிக்காட்டினார்.
நிலுவையில் உள்ள தொழில்நுட்ப மற்றும் நிர்வாகப் பணிகளை முடித்து, எதிர்வரும் மார்ச் மாதத்திற்குள் இத்திட்டத்தைச் செயல்பாட்டிற்குக் கொண்டுவர அரசாங்கம் தீர்மானித்துள்ளது.
கடந்த ஆண்டு ஜூலை மாதம், இலங்கையின் சுற்றுலாத் துறையை மேம்படுத்துவதற்காக 33 நாடுகளுக்கு இலத்திரனியல் பயண அனுமதி திட்டத்திலிருந்து விலக்கு அளிக்கப்பட்டது. இந்தப் பட்டியலில் உள்ள நாடுகளின் சுற்றுலாப் பயணிகள் எவ்வித கட்டணமுமின்றி அல்லது எளிமையான நடைமுறைகள் மூலம் இலங்கைக்கு வர வழிவகை செய்யப்பட்டிருந்தது.
இந்தத் திட்டம் முறைப்படி நடைமுறைக்கு வரும்போது விசா நடைமுறைகள் டிஜிட்டல் மயமாக்கப்பட்டு எளிதாகும்.
சுற்றுலாப் பயணிகளின் வருகை அதிகரிப்பதன் மூலம் அந்நியச் செலாவணி ஈட்டப்படும், விமான நிலையங்களில் குடிவரவு நெரிசல் குறைக்கப்படும்.
இலங்கையை ஆசியாவின் முதன்மையான சுற்றுலாத் தலமாக மாற்றுவதற்கான அரசாங்கத்தின் நீண்டகாலத் திட்டத்தின் ஒரு பகுதியாக இது பார்க்கப்படுகிறது.