அமெரிக்க அதிபர் டொனால்ட் டிரம்ப் வெள்ளை மாளிகையில் முன்னெடுத்து வரும் பல மில்லியன் டாலர் மதிப்பிலான பிரம்மாண்ட நடன மண்டபக் கட்டுமானத் திட்டத்திற்கு (White House Ballroom Project) அமெரிக்க ஃபெடரல் நீதிமன்றம் தற்காலிகத் தடை விதித்துள்ளது. வாஷிங்டன் டி.சி. மாவட்ட நீதிபதி ரிச்சர்ட் லியோன் (Richard Leon) நேற்று (மார்ச் 31, 2026) வழங்கிய 35 பக்கத் தீர்ப்பில், அமெரிக்க நாடாளுமன்றத்தின் (Congress) முறையான சட்டப்பூர்வ அனுமதியின்றி இத்தகைய பாரிய கட்டுமானப் பணிகளை முன்னெடுக்க அதிபருக்கு அதிகாரம் இல்லை எனத் திட்டவட்டமாகத் தெரிவித்துள்ளார். “அதிபர் வெள்ளை மாளிகையின் தற்காலிகப் பொறுப்பாளர் மட்டுமே, அதன் உரிமையாளர் அல்ல” என நீதிபதி தனது தீர்ப்பில் சுட்டிக்காட்டியுள்ளார்.
வரலாற்றுப் பாதுகாப்புக்கான தேசிய அறக்கட்டளை (National Trust for Historic Preservation) தாக்கல் செய்த வழக்கினைத் தொடர்ந்தே இந்தத் தீர்ப்பு வெளியாகியுள்ளது. 1902-ஆம் ஆண்டு கட்டப்பட்ட வரலாற்றுச் சிறப்புமிக்க வெள்ளை மாளிகையின் கிழக்குப் பகுதியை (East Wing) இடித்துவிட்டு, சுமார் 1,350 விருந்தினர்கள் அமரக்கூடிய 90,000 சதுர அடி பரப்பளவிலான புதிய நடன மண்டபத்தைக் கட்ட டிரம்ப் நிர்வாகம் திட்டமிட்டிருந்தது. சுமார் 400 மில்லியன் டாலர் செலவில் தனியார் நன்கொடைகள் மூலம் மேற்கொள்ளப்படும் இத்திட்டம், முறையான சுற்றுச்சூழல் மதிப்பீடு அல்லது தேசிய தலைநகர திட்டமிடல் ஆணையத்தின் (NCPC) அனுமதி இன்றித் தொடங்கப்பட்டதாகப் பாதுகாப்பு அமைப்பு குற்றம் சாட்டியிருந்தது.
இந்தத் தீர்ப்பிற்குக் கடும் எதிர்ப்புத் தெரிவித்துள்ள அதிபர் டிரம்ப், இதற்கு எதிராக மேல்முறையீடு செய்யப் போவதாகத் தனது ‘ட்ரூத் சோஷியல்’ (Truth Social) தளத்தில் பதிவிட்டுள்ளார். அடுத்த மாதம் அமெரிக்காவிற்கு உத்தியோகபூர்வ விஜயம் மேற்கொள்ளவுள்ள பிரித்தானியாவின் மூன்றாம் சார்லஸ் மன்னரை (King Charles III) கௌரவமாக உபசரிப்பதற்குத் தற்போதுள்ள வசதிகள் போதுமானதாக இல்லை என்றும், மழையினால் நனையும் கூடாரங்களில் உலகத் தலைவர்களை அமர வைக்க முடியாது என்றும் அவர் வாதிட்டுள்ளார். வரி செலுத்துவோரின் பணம் இன்றி, திட்டமிட்டதை விடக் குறைந்த செலவில் உலகிலேயே மிகச்சிறந்த கட்டிடமாக இது அமையும் என அவர் மேலும் குறிப்பிட்டுள்ளார்.
நீதிபதி லியோனின் இந்த உத்தரவு 14 நாட்களில் அமலுக்கு வரவுள்ள நிலையில், அதுவரை கட்டுமானப் பணிகளைத் தொடர டிரம்ப் நிர்வாகத்திற்கு அவகாசம் கிடைத்துள்ளது. இருப்பினும், வெள்ளை மாளிகையின் பாதுகாப்பு மற்றும் உறுதித்தன்மைக்காக மேற்கொள்ளப்படும் அத்தியாவசியப் பணிகளுக்கு இத்தடையிலிருந்து விலக்கு அளிக்கப்பட்டுள்ளது. அமெரிக்க அரசியலமைப்பின்படி, பொதுச் சொத்துக்கள் தொடர்பான விதிகளையும் அங்கீகாரங்களையும் வழங்கும் அதிகாரம் நாடாளுமன்றத்திற்கே உரியது என்பதை இந்தத் தீர்ப்பு மீண்டும் உறுதிப்படுத்தியுள்ளதாகச் சட்ட வல்லுநர்கள் கருத்துத் தெரிவித்துள்ளனர்.
