அமெரிக்காவால் தாக்கப்பட்ட ஃபோர்டோ அணுசக்தி மையத்தில் மீண்டும் கட்டுமானப் பணிகள் தொடங்கப்பட்டுள்ளதாக சர்வதேச ஊடகங்கள் செய்தி வெளியிட்டுள்ளன.
செய்மதி படங்களில் மண்ணை அகற்றும் இயந்திரங்கள், சுரங்கப்பாதைகள் அருகே நடவடிக்கைகள், மற்றும் பணிகளுக்காக அமைக்கப்பட்ட கூடாரங்கள் ஆகியவை காணப்பட்டுள்ள நிலையில் குறித்த செய்தி வெளியாகியுள்ளது.
ஈரானின் ஃபோர்டோ (Fordow) அணுசக்தி மையம், தெஹ்ரானுக்கு தெற்கே சுமார் 100 கி.மீ. தொலைவில், மலைப்பகுதியில் நிலத்தடியில் அமைந்துள்ள முக்கியமான யுரேனியம் செறிவூட்டல் தளமாகும்.
2025 ஜூன் 22 அன்று, அமெரிக்காவின் B-2 ஸ்டெல்த் விமானங்கள் மற்றும் GBU-57 பங்கர் பஸ்டர் குண்டுகளைப் பயன்படுத்தி ஃபோர்டோ உள்ளிட்ட மூன்று அணுசக்தி தளங்கள் மீது தாக்குதல் நடத்தப்பட்டது.
இந்த தாக்குதல்கள் ஈரானின் அணுசக்தி திட்டங்களை குறிவைத்து நடத்தப்பட்டவையாகும், ஆனால் சேதத்தின் அளவு குறித்து தெளிவான தகவல்கள் இல்லை.
இந்நிலையில் அமெரிக்காவின் தாக்குதலுக்குப் பிறகு ஈரான் தனது அணுசக்தி தளத்தை மீட்டெடுக்கும் முயற்சியில் ஈடுபட்டுள்ளதாக குறித்த செய்மதி படங்கள் சுட்டிக்காட்டப்படுகிறது.
இந்த மீள் கட்டுமான முயற்சிகள், ஈரானின் அணுசக்தி திட்டங்களை மீண்டும் தொடர விரும்புவதாகவும், தாக்குதல்களால் தடைபடாது என்பதை உறுதிப்படுத்தும் வகையில் தெஹ்ரான் செயல்படுவதாகவும் கருதப்படுகிறது.
