பாலியல் குற்றவாளியான மறைந்த ஜெப்ரி எப்ஸ்டீனுக்குச் சொந்தமான சர்ச்சைக்குரிய தீவுக்குத் தான் சென்றிருந்ததை அமெரிக்க வர்த்தகச் செயலாளர் ஹோவர்ட் லட்னிக் (Howard Lutnick) முதன்முறையாகப் பகிரங்கமாக ஒப்புக்கொண்டுள்ளார். 2005-ஆம் ஆண்டிலேயே எப்ஸ்டீனுடனான தொடர்புகளைத் துண்டித்துவிட்டதாக முன்னதாக நாடாளுமன்றத்தில் சத்தியம் செய்து கூறியிருந்த லட்னிக், தற்போது 2012-ஆம் ஆண்டு அந்தத் தீவிற்குச் சென்றதை ஒப்புக்கொண்டிருப்பது அவர் மீதான நம்பகத்தன்மையைச் சிதைத்துள்ளது. அமெரிக்க நீதித் திணைக்களம் வெளியிட்ட 35 இலட்சம் ஆவணங்கள் மூலம் லட்னிக்கின் பயணத் தகவல்கள் கசிந்ததைத் தொடர்ந்தே, அவர் இந்தத் திடுக்கிடும் உண்மையை வெளிப்படுத்தியுள்ளார்.
எப்ஸ்டீன் சிறுமிகளைப் பாலியல் தொழிலில் ஈடுபடுத்திய குற்றத்திற்காக 2008-ஆம் ஆண்டே தண்டிக்கப்பட்ட ஒரு குற்றவாளி என்பது குறிப்பிடத்தக்கது. அத்தகைய நபரின் தீவுக்கு 2012 டிசம்பரில் தனது குடும்பத்துடன் சென்று மதிய உணவு அருந்தியதாக லட்னிக் அளித்துள்ள விளக்கம், அமெரிக்க செனட் உறுப்பினர்களிடையே கடும் கொந்தளிப்பை ஏற்படுத்தியுள்ளது. “ஒரு தண்டனை பெற்ற குற்றவாளியின் இடத்திற்கு அரசின் உயர்மட்டப் பொறுப்பில் இருப்பவர் சென்றதை ஏன் மறைத்தார்?” எனச் செனட்டர் கிறிஸ் வோன் ஹோலன் உள்ளிட்டோர் கேள்வி எழுப்பியுள்ளதுடன், லட்னிக்கை உடனடியாகப் பதவி விலகுமாறு வலியுறுத்தி வருகின்றனர்.
இருப்பினும், இந்த விவகாரத்தில் வர்த்தகச் செயலாளர் லட்னிக் மீது ஜனாதிபதி டொனால்ட் ட்ரம்ப் முழுமையான நம்பிக்கை வைத்துள்ளதாக வெள்ளை மாளிகை அறிவித்துள்ளது. இது ஒரு தற்செயலான மதிய உணவிற்கான சந்திப்பு மட்டுமே தவிர, இதில் எவ்வித குற்றப் பின்னணியும் இல்லை என லட்னிக் வாதிட்டு வருகிறார். ஆனால், எப்ஸ்டீன் தொடர்பான ஆவணங்கள் தொடர்ந்து வெளியாகி வருவதால், அமெரிக்காவின் இன்னும் பல செல்வாக்கு மிக்க அரசியல் மற்றும் வணிகப் புள்ளிகளின் பெயர்கள் இந்த ‘மர்மத் தீவு’ விவகாரத்தில் சிக்கும் என எதிர்பார்க்கப்படுகிறது.
மறுபுறம், எப்ஸ்டீனால் பாதிக்கப்பட்ட பெண்கள் ஒன்றிணைந்து ‘வெர்ஜீனியா சட்டத்தை’ (Virginia Act) நிறைவேற்றுமாறு கோரி வெள்ளை மாளிகை முன் போராட்டத்தில் ஈடுபட்டுள்ளனர். பாலியல் துஷ்பிரயோக வழக்குகளுக்கான கால வரம்பை நீக்கக் கோரும் இந்தச் சட்டமூலம், பாதிக்கப்பட்டவர்களுக்கு நீதி கிடைப்பதற்கான புதிய வாசலாகப் பார்க்கப்படுகிறது. எப்ஸ்டீன் வழக்கின் முக்கியப் போராட்டவாதி வெர்ஜீனியா கிஃப்ரெ நினைவாக 2025-இல் முன்வைக்கப்பட்ட இந்தச் சட்டம், தற்போது லட்னிக் விவகாரத்தினால் மீண்டும் அமெரிக்க அரசியலில் பேசுபொருளாக மாறியுள்ளது.
