இஸ்ரேலிய நாடாளுமன்றத்தில் நிறைவேற்றப்பட்டுள்ள பாலஸ்தீனர்களுக்கான மரண தண்டனைச் சட்டம் சர்வதேச சட்டங்களுக்கு எதிரானது என்றும், அதனை உடனடியாக ரத்து செய்ய வேண்டும் என்றும் ஐக்கிய நாடுகள் மனித உரிமைகள் அலுவலகம் (OHCHR) வலியுறுத்தியுள்ளது. எந்தவொரு சூழ்நிலையிலும், எந்தவொரு குற்றத்திற்காகவும் மரண தண்டனை வழங்கப்படுவதை ஐக்கிய நாடுகள் சபை கொள்கை ரீதியாக எதிர்ப்பதாகத் தெரிவித்துள்ள அந்த அலுவலகம், புதிய சட்டமானது மனித கண்ணியத்திற்கு எதிரானது எனச் சுட்டிக்காட்டியுள்ளது.
புதிய சட்டத்தை அமுல்படுத்துவது கொடூரமான மற்றும் மனிதாபிமானமற்ற தண்டனைகளைத் தடை செய்யும் சர்வதேச விதிகளைப் பகிரங்கமாக மீறும் செயலாகும் என ஐநா மனித உரிமைகள் ஆணையாளர் வோல்கர் டர்க் (Volker Türk) எச்சரித்துள்ளார். குறிப்பாக, இந்தச் சட்டமானது ஆக்கிரமிக்கப்பட்ட மேற்குக் கரை மற்றும் இஸ்ரேலில் உள்ள பாலஸ்தீனியர்களுக்கு மட்டுமே பிரத்யேகமாகப் பயன்படுத்தப்படும் வகையில் வடிவமைக்கப்பட்டுள்ளதால், இது “இன ஒதுக்கல்” (Apartheid) மற்றும் முறையான “இனப் பாகுபாட்டை” சட்டப்பூர்வமாக்கும் என ஐநா கவலை வெளியிட்டுள்ளது.
பாலஸ்தீனியர்கள் பெரும்பாலும் முறையற்ற மற்றும் நேர்மையற்ற இராணுவ நீதிமன்ற விசாரணைகளுக்குப் பின்னரே தண்டிக்கப்படுவதாகச் சர்வதேச மனித உரிமை அமைப்புகள் குற்றம் சாட்டி வருகின்றன. இத்தகைய பலவீனமான நீதித்துறை சூழலில், மரண தண்டனை போன்ற மீளப் பெற முடியாத தண்டனைகளை அமுல்படுத்துவது பாரிய மனித உரிமை மீறல்களுக்கு வழிவகுக்கும் என ஐநா தனது சமூக வலைத்தள அறிக்கையில் குறிப்பிட்டுள்ளது. மேலும், இது சர்வதேச சிவில் மற்றும் அரசியல் உரிமைகள் உடன்படிக்கையின் (ICCPR) கீழ் இஸ்ரேல் கொண்டுள்ள கடப்பாடுகளுக்கு முரணானது எனவும் தெரிவிக்கப்பட்டுள்ளது.
இஸ்ரேலின் இந்த அதிரடி சட்ட மாற்றமானது சர்வதேச சமூகத்திடம் இருந்து தனிமைப்படுத்தப்படுவதற்கான வாய்ப்புகளை அதிகரிக்கும் என அரசியல் ஆய்வாளர்கள் கருதுகின்றனர். ஐக்கிய நாடுகள் சபையுடன் இணைந்து ஜெர்மனி, பிரான்ஸ், இத்தாலி மற்றும் பிரித்தானியா போன்ற நாடுகளும் இந்தச் சட்டத்திற்குத் தங்களது எதிர்ப்பைப் பதிவு செய்துள்ளன. இந்தச் சட்டம் நடைமுறைக்கு வரும்போது, இது சர்வதேச நீதிமன்றங்களில் இஸ்ரேலுக்கு எதிரான போர்க்குற்ற விசாரணைகளை மேலும் வலுப்படுத்தும் என எதிர்பார்க்கப்படுகிறது.
